अंबरनाथः रेल्वे स्थानकावर एका तिकीट तपासनीसाच्या सतर्कतेने धावत्या लोकलसल ओढल्या जाणाऱ्या महिला प्रवाशांचे प्राण वाचले आहेत. शुक्रवारी सकाळी सात वाजण्याच्या सुमारास कर्जत लोकलच्या वेळी हा प्रकार घडला. तिकीट तपासनीसाने सतर्कता दाखवत लोकल आणि फलाटाच्या मध्ये अडकलेल्या महिला प्रवाशाला ओढून त्यांचे प्राण वाचवले.
अंबरनाथ रेल्वे स्थानकात सकाळी सात वाजून तीन मिनिटांनी कर्जतला जाणारी लोकल आली होती. या लोकलमध्ये चढताना एका वयोवृद्ध महिला प्रशाचा तोल गेला. त्यामुळे त्या पडल्या आणि फलाट आणि लोकलमध्ये अढकून घासत जात होत्या. त्याचवेळी स्थानकात उपस्थित असलेल्या तिकीट तपासनीस अबिनाश कुमार आणि शाम्यु यांनी तातडीने धाव घेत या महिलेला लोकलपासून मागे खेचत त्यांचे प्राण वाचवले. मध्य रेल्वे प्रशासनाने ट्विटद्वारे या घटनेची चित्रफीत प्रसारीत करत माहिती दिली. कर्तव्यावर असलेल्या तिकीट तपासनीस आणि सहप्रवाशाचे या कृतीमुळे कौतुक होते आहे.
