लोकसत्ता खास प्रतिनिधी
कल्याण: येथील पारनाका भागात शनिवारी एका रिक्षा चालकाने भरधाव वेगात आणि निष्काळजीपणे एका पादचारी महिलेला जोराची धडक दिली. धडकेत महिला गंभीर जखमी झाली आहे. रस्त्यावर पडलेल्या महिलेला रुग्णालयात नेण्यासाठी साहाय्य करण्याऐवजी आरोपी रिक्षा चालक घटनास्थळावरुन पळून गेला.
योजना सचिन डाके (४०, रा. गौरवप्रसाद सोसायटी, पारनाका, कल्याण) असे गंभीर जखमी महिलेचे नाव आहे. पोलिसांनी सांगितले, योजना आणि त्यांची मुलगी शनिवारी सकाळी गांधी चौक ते पारनाका भागातून पायी चालल्या होत्या. पारनाका भागातून रस्त्याच्या कडेने चालत असताना अचानक एक रिक्षा चालक भरधाव वेगाने पाठीमागून आला. त्याने योजना डाके यांना पाठीमागून जोराची धडक मारली. या धडकेत योजना यांच्या हाताला आणि पायाला गंभीर दुखापत झाली.
आपल्या हातून अपघात झाला आहे हे माहिती असुनही जखमी पादचारी महिलेला मदत करण्याऐवजी संबंधित अज्ञात रिक्षा चालक घटनास्थळावरुन पळून गेला. योजना डाके यांनी बाजारपेठ पोलीस ठाण्यात अज्ञात रिक्षा चालकाविरुध्द तक्रार केली. पोलिसांनी गुन्हा दाखल करुन तपास सुरू केला आहे.
