ठाणे : प्रेयसीला मोटारीची धडक देऊन गंभीर जखमी केल्याप्रकरणी महाराष्ट्र राज्य रस्ते विकास महामंडळाचे व्यवस्थापकीय संचालक अनिल गायकवाड यांचा मुलगा अश्वजित गायकवाड यांच्यासह तीन जणांवर गुन्हा दाखल झाला आहे. परंतु याप्रकरणी अद्याप कुणालाही अटक करण्यात आलेली नाही.
या प्रकरणात आरोपींवर हत्येचा प्रयत्न केल्याचा गुन्हा दाखल करण्याची मागणी पीडितेने करूनही पोलिसांनी ती मान्य केलेली नाही. यामुळे या प्रकरणात पोलिसांवर दबाव असल्याची चर्चा चालू आहे.
हेही वाचा >>> दुर्बलांचा उत्कर्ष हेच बँकांचे अधिष्ठान – सरसंघचालक डाॅ. मोहन भागवत
घोडबंदर येथील वाघबीळ भागात राहणाऱ्या एका २६ वर्षीय तरुणीने अश्वजित गायकवाड यांच्याशी गेल्या साडेचार वर्षांपासून प्रेमसंबंध असल्याचा दावा केला आहे. ११ डिसेंबर रोजी पहाटे ४.३० वाजता अश्वजीत याने घोडबंदर येथील एका हॉटेलजवळ आपल्याला भेटण्यास बोलावले. तेथे आमच्यात वाद झाल्यानंतर त्याने मारहाण करत मोटारीने धडक देऊन गंभीर जखमी केल्याचा आरोप पीडितेने केला होता.
तरुणीने दिलेल्या तक्रारीच्या आधारे कासारवडवली पोलिसांनी अश्वजीत याच्यासह तीन जणांविरोधात गुन्हा दाखल केला आहे. गुन्ह्यात दुखापत करणे, बेदरकारपणे वाहन चालविणे हत्येचा प्रयत्न करणे, धमकावणे आदी गुन्हे दाखल करण्यात आले आहेत. परंतु या गुन्ह्यात अद्याप कुणालाही अटक करण्यात आलेली नाही.
मी सांगितलेला घटनाक्रम पोलिसांत दाखल गुन्ह्यात नमूद केलेला नाही. त्यामुळे मला पुन्हा माझा जबाब नोंदवायचा आहे. या प्रकरणात ३०७ कलमाअंतर्गत गुन्हा दाखल करावा, अशी मागणी पीडित तरुणीने केली होती.
‘३०७ नुसार गुन्हा दाखल करा’ पीडित तरुणीच्या वकील दर्शना पवार यांनी पत्रकारांना सांगितले की, हे प्रकरण गंभीर असून आरोपींवर ३०७ कलमानुसार गुन्हा दाखल करणे आवश्यक आहे. परंतु पोलिसांनी या कलमाखाली गुन्हा दाखल केलेला नाही. दरम्यान, याप्रकरणात एक बडा उद्योगपती हस्तक्षेप करत असल्याचीही चर्चा चालू आहे.
