बदलापूरहून सुटणाऱ्या लोकलमध्ये अंबरनाथकरांची घुसखोरी; अंबरनाथहून उलटे बसून येणाऱ्या प्रवाशांमुळे वाद वाढले

बदलापूरः  बदलापूर रेल्वे स्थानकातून सुटणाऱ्या आणि मुंबईकडे जाणाऱ्या लोकलमध्ये अंबरनाथहून प्रवासी आधीच बसून येत असल्याने वाद होऊ लागलेत. या वादाची एक चित्रफीत नुकतीच समोर आली आहे. बदलापूर स्थानकात आधीच सर्व लोकल गाड्या तुडूंब भरून जातात. त्यात स्थानकातून सुटणाऱ्या लोकल आधीच भरून येत असल्याने प्रवाशांत संतापाचे वातावरण आहे. बदलापूर रेल्वे स्थानकातून सुटणाऱ्या लोकलमध्ये अंबरनाथचे प्रवासी आधी चढून जागा बळकावून ठेवतात. त्यामुळे बदलापूरहून चढलेल्या प्रवाशांना आपल्या हक्काच्या लोकलमध्ये सुद्धा जागा मिळत नाही. परिणामी प्रवाशांना उभ्याने प्रवास करावा लागतो.