सुरक्षिततेचे भयचक्र भेदण्यासाठी ‘ती’चा पुढाकार

विरारच्या विवा महाविद्यालयाच्या वाणिज्य शाखेच्या शेवटच्या वर्षांत शिकत असलेली आरती वाडेर (१९) हिने आजवर २९हून अधिक ठिकाणी व्याख्याने देऊन कोवळय़ा वयातील मुलींना सतर्क करण्यात यश मिळवले आहे. ‘महिला अत्याचाराच्या आणि फसवणुकीच्या बातम्या दररोज वाचनात यायच्या. त्यामुळे मनात भीेतीे आणि न्यूनगंड निर्माण झाला होता. विरारमध्ये यंग स्टार ट्रस्ट या संस्थेतर्फे आयोजित करण्यात आलेल्या एका पथनाटय़ात भाग घेतला आणि आत्मविश्वास मिळाला. आपल्याप्रमाणेच अन्य मुलींनाही जागृत करावे, असे ठरवले. त्यासाठी ट्रस्टचे आजीव पाटील आणि मिलिंद पोंक्षे यांची खूप मदत मिळाली,’ असे आरती सांगते. ‘जाणीव’ या उपक्रमाच्या माध्यमातून आरती शाळा आणि महाविद्यालयांत विनामूल्य व्याख्याने देते. या व्याख्यानात मुलींना विचार, संस्कार, भय, स्पर्श, प्रलोभने, वर्तणूक, व्यवस्थापन आणि व्यक्तिमत्त्व विकास अशा आठ मुद्दय़ांवर माहिती देण्यात येते. समाजात वावरताना अयोग्य स्पर्श कोणता, हे कसे ओळखावे, याची जाणीव त्यांना करून दिली जाते, असे आरती म्हणते.

‘मुलीे नको त्या गोष्टींना घाबरतात. दृश्य आणि अदृश्य स्वरूपाचे भय त्यांना सतावत असते. त्यांच्यात पटकन राग येण्याचा, इतरांना आकर्षित करून घेण्याचा व्यक्तिमत्त्वातीेल दोष असतो. तारुण्यात त्या पैसे, मोटारसायकली आणि इतर तत्सम प्रलोभनांना बळी पडतात. यातून बाहेर कसे पडायचे, याची माहिती मी देते,’ असे आरती सांगते. आपलीे आई हीच खरी मॅनेजमेंट गुरू आहे. तिला मैत्रीण मानायला हवं, असा सल्ला ती मुलींना देते. त्यांच्याच वयाची असल्याने मुली तिच्याशी पटकन संवाद साधतात.