वर्तकनगर येथील समतानगर भागात बंदी असलेल्या प्लास्टिक पिशव्या वापरणाऱ्या दुकानदारांवर कारवाईसाठी गेलेल्या महापालिकेच्या पथकातील अधिकारी, कर्मचाऱ्याला दुकानातील कर्मचाऱ्याने शिवीगाळ, धक्काबुक्की आणि मारहाण केल्याचा प्रकार शनिवारी उघडकीस आला. याप्रकरणी वर्तकनगर पोलीस ठाण्यात बलाराम देवासी (२४) याच्याविरोधात गुन्हा दाखल करण्यात आला आहे.
हेही वाचा >>>ठाणे: इंधन दरवाढ आणि कच्चा मालाच्या किंमतीमुळे धुलिवंदनचा रंग फिका; रंग, पिचकारीच्या दरात २० ते २५ टक्क्यांनी वाढ
ठाणे महापालिकेच्या घनकचरा व्यवस्थापन विभागाच्या वतीने शहरात बंदी असलेल्या प्लास्टिक वापर आणि विक्री करणाऱ्या विक्रेत्यांवर कारवाई केली जात आहे. त्यानुसार या विभागाचे उपमुख्य स्वच्छता निरीक्षक हेमंत चौधरी, स्वच्छता निरीक्षक समीर डोळे आणि प्रभारी स्वच्छता निरीक्षक दिपेश मंत्री हे समतानगर भागात करवाईसाठी गेले होते. त्यावेळेस पथकभैरूभवानी सुपर मार्केट या दुकानात गेले. दुकानात प्लास्टिकच्या पिशव्या तसेच इतक प्लास्टिकचे साहित्य आढळून आले. त्यामुळे पथक जप्तीची कारवाई करत असताना दुकानातील कर्मचारी बलाराम देवासी हा त्यांच्यासोबत वाद घालू लागला. त्यानंतर त्याने पथकाला शिवीगाळ, धक्काबुक्की केली. या दरम्यान हेमंत यांच्या डोळ्याजवळ मार लागला. त्यानंतर पथकाने पास्टिक साहित्य जप्त करण्यासाठी सफाई कर्मचारी उस्मान खान आले असता, त्यांनाही देवासीने मारहाण केली. याप्रकरणी हेमंत यांनी दिलेल्या तक्रारीच्या आधारे वर्तकनगर पोलीस ठाण्यात गुन्हा दाखल करण्यात आला आहे.
