पाणीपुरी खाण्यास पैसे दिले नाही म्हणून एकाला जीवेठार मारण्याचा प्रयत्न करण्यात आल्याचा प्रकार रविवारी सायंकाळी कळवा येथे उघडकीस आला. समीर अन्सारी (३५) असे जखमीचे नाव आहे. तर याप्रकरणी कळवा पोलीस ठाण्यात अजय लाडे उर्फ ब्याव याच्याविरोधात गुन्हा दाखल करण्यात आला आहे. हेही वाचा >>>ठाणे: लैंगिक अत्याचारामुळे तरुणीची आत्महत्या कळवा येथील महात्माफुले नगर परिसरात समीर राहतात. ते परिसरात मजुरी करतात. रविवारी सायंकाळी ते घराच्या दिशेने जात असताना अजय लाडे याने त्यांना शिवीगाळ करत पाणीपुरी खाण्यास पैसे मागिण्यास सुरूवात केली. समीर यांनी पाणीपुरी खाण्यासाठी पैसे देण्यास नकार दिला असता, अजय याने त्यांना मारहाण करण्यास सुरूवात केली. तसेच त्याच्या हातातील एका टोकदार वस्तूने डोक्यात वार केला. त्यामुळे समीर यांच्या डोक्यातून रक्तस्त्राव होऊ लागला. त्यांना कळवा येथील ठाणे महापालिकेच्या छत्रपती शिवाजी महाराज रुग्णालयात दाखल करण्यात आले. त्यांच्यावर उपचार सुरू आहेत. त्यांनी दिलेल्या तक्रारीच्या आधारे याप्रकरणात अजयविरोधात गुन्हा दाखल करण्यात आला आहे.
