बदलापूर आंदोलनातील आंदोलक ‘बदलापूरकरच’; आंदोलनातल्या २५ अटक आरोपींपैकी २३ जण ‘बदलापूरकर’

बदलापूर शहरात २० ऑगस्टला झालेल्या आंदोलनाचे पडसाद संपूर्ण देशभर उमटले आहेत. मात्र, हे आंदोलक बदलापुरातील नसून बाहेरचे असल्याची भूमिका स्वतः मुख्यमंत्री एकनाथ शिंदे यांनी घेतली होती. तसेच, भाजपचे स्थानिक आमदार किसन कथोरे, शिवसेनेच्या शिंदे गटाचे वामन म्हात्रे यांनी देखील हाच पवित्रा घेतला होता. यामुळे बदलापुरात भडकलेले आंदोलन हे बदलापूरकरांचे की बाहेरच्यांचे? यावरून संभ्रम निर्माण झाला होता. मात्र, या आंदोलनात अटक झालेल्या २५ जणांवरून खुलासा झालाय की हे आंदोलक शहरातील होते. त्यांच्यावर नोंद झालेल्या एफआयआरमध्ये त्यांचे पत्ते नमूद करण्यात आले आहेत. यातील रायगड जिल्ह्यातील उकरूळ येथील एक, भिवपुरी येथील दुसरा तर बदलापूर शहराच्या हद्दीपासून जवळच्या कासगांव येथील एक असे ३ अटक आंदोलक शहराबाहेरील आहेत. तर उर्वरित २२ आंदोलक हे बदलापूरचे रहिवासी आहेत. तसेच,यातील प्रमुख २५ आरोपी आणि त्यांची नावे पाहता ते देखील बदलापूर शहरातील असल्याचं उघड झालंय.

हेही वाचा >>>तुम्हाला आता समजले असेल महाराष्ट्र पोलिसांनी विश्वासार्हता का गमावली, जितेंद्र आव्हाडांची टीका

समाजमाध्यमांवर एफआयआर

आंदोलकांवर नोंद झालेल्या एफआयआरची पीडीएफ प्रत सध्या संपूर्ण शहरात व्हॉट्सअपमार्फत व्हायरल झाली आहे. याचा आधार घेत शहरातील नागरिक; ‘आंदोलक बदलापूरचेच होते’, ‘आम्ही बदलापूरचे नाहीत हे नाकारणारे तुम्ही कोण?’ अशा आशयाचे संदेश समाजमाध्यमांवर पसरवताना दिसत आहेत. हे संदेश पसरवाताना या एफआयआरमध्ये अटक आरोपींच्या नोंद पत्त्यांचा दाखला दिला जात आहे.

आंदोलकांचे वकीलही ‘बदलापूरकर’

या आंदोलकांचं वकील पत्र उल्हासनगर तालुका वकील संघटनेच्यावतीने घेण्यात आले आहे. या संघटनेचे सदस्य असलेले अँडव्होकेट प्रियेश जाधव हे बदलापूरचेच असून ते स्वतः कोर्टात आंदोलकांची बाजू मांडत आहेत. जाधव यांनी सांगितल्यानुसार, हे आंदोलन उत्स्फूर्त होतं. सगळे आंदोलक हे बदलापूर शहराचेच नागरिक आहेत. त्यांना बाहेरचे म्हणणं हे कधीच योग्य ठरणार नाही.