Badlapur Local Train Update : बदलापूरमधील आंदोलनामुळे ठप्प झालेली रेल्वे सेवा १० तासानंतर सुरळीत; प्रवाशांना दिलासा

पोलिसांच्या लाठीचार्च केल्यानंतर आंदोलक रुळावरून हटले. जवळपास दहा तासांपासून रेल्वे मार्ग ठप्प होता. रेल्वेसेवा ठप्प झाल्यामुळे अनेक प्रवाशी खोळबले होते. एवढंच नाही तर बदलापूरमधून जाणाऱ्या आणि येणाऱ्या लोकलची सेवाही ठप्प झाली होती. मात्र, पोलिसांनी लाठीचार्च करत रेल्वे मार्ग मोकळा केला. त्यानंतर अखेर संध्याकाळी बदलापूर रेल्वे स्थानकावरून पुन्हा एकदा रेल्वे सेवा सुरळीत झाली. यानंतर बदलापूरवरून सीएसएमटीकडे जाणारी लोकल वाहतूक सुरू झाल्यामुळे प्रवाशांना दिलासा मिळाला.

हेही वाचा : “ठराविक लोकांना इथं सोडलं”, बदलापूरच्या आंदोलनावरून गिरीश महाजनांचा विरोधकांवर गंभीर आरोप

नेमकं घटना काय?

बदलापुरातील एका शाळेतील दोन चिमुकल्या मुलींवर लैंगिक अत्याचाराच्या घटनेनंतर सकाळपासून शहरात कडकडीत बंद पाळण्यात आला. सकाळी सहा वाजल्यापासून शाळेच्या समोर पालकांकडून आंदोलन सुरू होतं. त्यानंतर साडेनऊ वाजल्यानंतर आंदोलकांनी आपला मोर्चा रेल्वे स्थानकाकडे वळवला. यानंतर आंदोलकांनी रेल्वे रुळावर ठिय्या मांडला. त्यामुळे बदलापूर कर्जत रेल्वे सेवा पूर्णपणे ठप्प झाली. त्यामुळे हजारो रेल्वे प्रवाशांना त्याचा फटका बसला.

यानंतर पोलिसांनी सातत्याने आवाहन करूनही आंदोलक हटत नव्हते. रेल्वे पोलीस, वरिष्ठ पोलीस अधिकारी, मंत्री गिरीश महाजन यांच्या सह स्थानीक लोकप्रतिनिधींनी आंदोलकांची समजूत काढली. मात्र त्यानंतरही आंदोलक हटत नव्हते. यामुळे जवळपास नऊ ते दहा तास रेल्वे मार्ग ठप्प होता. अखेर पावणे सहाच्या सुमारास पोलिसांनी आंदोलकांवर लाठी हल्ला करत दहा मिनिटात रेल्वे मार्ग मोकळा केला. आंदोलनामुळे ठप्प झालेली रेल्वे सेवा अखेर १० तासानंतर सुरळीत झाली. तसेच बदलापूरवरून सीएसएमटीकडे जाणारी लोकल वाहतूक सुरू झाली आहे.

बदलापूर प्रकरणी एसआयटी स्थापन

बदलापूर लैंगिक अत्याचार प्रकरण हे धक्कादायक आहे आणि या प्रकरणात कुणालाही सोडणार नाही असा शब्द राज्याचे उपमुख्यमंत्री आणि गृहमंत्री देवेंद्र फडणवीस यांनी दिला आहे. आयपीएस अधिकारी आरती सिंह यांच्या अध्यक्षतेखाली एसआयटी स्थापन करुन सदर प्रकरणात कारवाईचे आदेश दिले आहेत.