डीजेच्या बंदीमुळे बॅन्जोला मागणी!

लग्नकार्यामधील एक अविभाज्य घटक असलेल्या बॅन्जो पथकाला डी.जे.मुळे मागणी कमी झाली. त्यामुळे बॅन्जो पथकामध्ये कार्यरत असणाऱ्या गरीब घरांतील तरुण मंडळींवर आर्थिक संकट ओढवले होते. नवनवीन गाण्यांचा दिवसरात्र सराव करून पूर्वी या पथकांना तासांवर पैसे दिले जायचे. मात्र महागाई वाढल्याने व वाहतुकीसाठी खर्च येऊ  लागल्याने हे पथक ८ ते १२ हजार रुपये इतकी रक्कम घेत असे.

डी.जे.समोर बॅन्जो पथकांचा टिकाव लागणे कठीण झाले होते. नवीन गाणी, त्यांचे मिक्स, मूड बदलणारी गाणी व मोठय़ा आवाजात हृदयाला धडकी देणारी गाणी लोकांना पसंत पडू लागली. २५ हजार रुपयांपासून पुढे या डी.जे. संचाचा खर्च होई व त्यामध्ये वाहतुकीसाठी ट्रक व रोषणाईचा अतिरिक्त खर्च होई. असे असताना नाचामध्ये झिंगण्यासाठी नागरिक डी.जे.ला पसंती देत असत. न्यायालयाने डीजेवर बंदी आणल्याने बॅन्जो पथकांना मागणी आली असून ही पथके, सध्या १५ ते २५ हजारांपर्यंतची आकारणी करीत आहेत.