शिवसेना ( ठाकरे गट ) पक्षप्रमुख उद्धव ठाकरे यांनी उपमुख्यमंत्री देवेंद्र फडणवीस यांना ‘फडतूस’ म्हटलं होते. यावरून भाजपा प्रदेशाध्यक्ष चंद्रशेखर बावनकुळे यांनी उद्धव ठाकरेंना इशारा दिला होता. उद्धव ठाकरेंनी मर्यादा सोडली, तर आम्हीही ऐकणार नाही. शेवटचा इशारा देत आहे. यापुढे फडणवीसांबाबत काही बोललात, तर ‘मातोश्री’बाहेर पडू देणार नाही, असे बावनकुळे म्हणाले होते.
या वक्तव्याचा आमदार भास्कर जाधव यांनी समाचार घेत त्यांची तुलना वेस्ट इंडिजच्या खेळाडूबरोबर केली आहे. ठाण्यात बोलताना भास्कर जाधव म्हणाले, “चंद्रशेखर बावनकुळे हे महाराष्ट्राचे आहेत, पण दिसतात वेस्ट इंडिजच्या खेळाडूसारखे. बावनकुळे पॅट्रिक पॅटरनसारखे दिसतात का तर नाही. ब्रायन लारासारखे दिसतात का तर नाही. मग, ते कोणासारखे दिसतात, तर वेस्ट इंडिजचे खेळाडू अ‍ॅब्रोससारखे दिसतात. जुन्या लोकांना माहिती आहे, अ‍ॅब्रोस कसे दिसत होते.”
हेही वाचा : “एकनाथांच्या राज्यात शेतकरी अनाथ! रामराज्य आणायचं असेल तर…” राजू शेट्टींनी सुनावले खडे बोल
“तुम्ही वेस्ट इंडिजच्या खेळाडूसारखे दिसता. पण, ते खेळाडू होते, तुम्ही कोणाबरोबर खेळताय, उद्धव ठाकरेंबरोबर. उद्धव ठाकरे तुम्हाला एका चेंडूत आऊट करतील, पत्ता सुद्धा लागणार नाही,” असे भास्कर जाधव यांनी म्हटलं.
“ज्या फडणवीसांनी तुम्हाला भावासारखे प्रेम दिले…”
“उद्धव ठाकरेंनी फडणवीसांबद्दल केलेल्या वक्तव्याने मर्यादा ओलांडली आहे. पण, अजूनही आम्ही त्यांना शेवटची संधी देत आहोत. यापुढे आमच्या नेत्यांबाबत अशी वक्तव्य करणार असाल, तर तुम्हाला सोडणार नाही. तुमचे घराबाहेर पडणे मुश्कील होईल. ज्या फडणवीसांनी तुम्हाला भावासारखे प्रेम दिले. त्यांच्याबाबत तुम्ही अशी विधाने कराल, असे कधीच वाटले नव्हते,” असे चंद्रशेखर बावनकुळेंनी सांगितलं होते.