भिवंडीत १२ वर्षानंतर भटक्या श्वान निर्बिजीकरण केंद्र

भिवंडीत काही महिन्यांपूर्वी भटक्या श्वानांच्या हल्ल्यात एका लहान मुलीचा मृत्यू झाला होता. तसेच मागील काही महिन्यांत भटक्या श्वानांचे नागरिकांवरील हल्ले सातत्याने वाढत होते. भिवंडी शहरात १३ हजाराहून अधिक भटके श्वान आहेत. १२ वर्षांपूर्वी भिवंडी महापालिकेचे श्वान निर्बिजीकरण केंद्र होते. परंतु काही तांत्रिक कारणांमुळे हे केंद्र बंद पडले होते. त्यामुळे भटक्या श्वानांची संख्या दिवसेंदिवस वाढत आहे. श्वानांच्या हल्ल्याबाबत नागरिकांच्या तक्रारीही वाढत होत्या. तर श्वान देखील विविध कारणांमुळे जखमी होत असतात. श्वानांसाठी निर्बिजीकरण केंद्र तयार करण्यात यावे यासाठी मागील काही वर्षांपासून भिवंडी महापालिकेने निविदा मागविल्या होत्या. परंतु या निविदांना प्रतिसाद मिळत नव्हता. अखेर हैदराबाद येथील एका कंपनीने श्वान निर्बिजीकरण केंद्रास प्रतिसाद मिळाला आहे.

हेह वाचा…टीएमटीची विना तिकीट प्रवास करणाऱ्यांवर कारवाई, गेल्या अकरा महिन्यात ६ हजाराहून अधिक प्रवाशांवर कारवाई

त्यानुसार, आता भिवंडी येथील इदगाह भागात हे केंद्र उभारण्यात आले आहे. शहरात दररोज भटके श्वान निर्बिजीकरणासाठी आणि जखमी श्वानांना उपचारासाठी केंद्रात नेले जात आहे. या केंद्रात श्वानांवर उपचार झाल्यानंतर पुन्हा त्यांना त्याच ठिकाणी आणून सोडले जात आहे. प्रत्येक श्वानाच्या उपचारासाठी कंपनीला एक हजार ४५० रुपये इतका दर निश्चित करण्यात आला असल्याची माहिती सुत्रांनी दिली.

हेह वाचा…स्थानक परिसरात बेकायदा फलकबाजी

श्वानांसाठी निर्बिजीकरण केंद्र १२ वर्षानंतर पुन्हा तयार झाले आहे. या केंद्रामध्ये भटक्या श्वानांवर उपचार देखील केले जात आहेत. निर्बिजीकरण केंद्रामुळे भटक्या श्वानांच्या वाढत्या संख्येवर नियंत्रण मिळविणे शक्य होणार आहे. – जयवंत सोनावणे, आरोग्य विभाग प्रमुख, भिवंडी महापालिका.