ठाणे : महापालिकेत काही मग्रुर आणि मस्तवाल अधिकाऱ्यांना वेळीच चाप लावण्याची गरज असल्याचे मत व्यक्त करत शहरातील बेकायदा बांधकामांना जबाबदार असलेल्या संबंधित अधिकाऱ्यांवर कारवाई करण्याची मागणी भाजपाचे आमदार संजय केळकर यांनी केली आहे. तसेच ध्वनीफितमधील संभाषण दुदैवी आणि संतापजनक असून त्याची चौकशी करावी आणि ते खरे असेल तर महेश आहेर यांना निलंबित करावे, अशी प्रतिक्रीया केळकर यांनी आव्हाड प्रकरणावर व्यक्त केली आहे.
ठाणे महापालिका क्षेत्रातील काही भागांतील नागरिकांना भेडसावत असलेली पाणी पुरवठा तसेच इतर समस्येवर उपाययोजना करण्यासाठी आमदार संजय केळकर यांनी गुरुवारी पालिका मुख्यालयात अधिकाऱ्यांसोबत बैठक घेतली. या बैठकीनंतर त्यांनी पत्रकारांशी संवाद साधला. ठाणे महापालिका क्षेत्रातील बेकायदा बांधकामांबाबत तत्कालीन आयुक्त डाॅ. विपीन शर्मा यांच्याकडे दिड वर्षांपूर्वी तक्रार केली होती. या बेकायदा बांधकामांचे पुरावे पेनड्राईव्हच्या माध्यमातून पालिका प्रशासनाला दिला. त्यात बेकायदा बांधकामे सुरू असतानाची काढलेली छायाचित्रे होती. तरीही त्यावर कोणतीच कारवाई झाली नाही, अशी खंत व्यक्त करत लकी कंपाउंड इमारत दुर्घटनेसारखी घटना घडल्यानंतर डोळे उघडणार का, असा प्रश्न केळकर यांनी उपस्थित केला आहे.
हेही वाचा – डोंबिवली जवळील गोळवली रिजन्सी इस्टेट संकुलात दहा दिवसांपासून पाण्याचा ठणठणाट
हेही वाचा – डोंबिवलीजवळ निवृत्त लष्करी जवानाचा हवेत गोळीबार
ठाणे महापालिकेत काही मग्रुर आणि मस्तवाल अधिकारी आहे. या अधिकाऱ्यांची अशी भावना आहे की, आपले कुणीच काही करू शकत नाही, असे मत केळकर यांनी व्यक्त केले. अशा प्रकारांना पायबंद घालण्यासाठी बेकायदा बांधकामांसंबंधी दिलेल्या पुराव्याची चौकशी करून त्यातील दोषींवर कारवाई करण्याची मागणी सातत्याने आयुक्तांकडे करीत आहे. परंतु, अशी कारवाई होत नाही, अशी खंत त्यांनी व्यक्त केली. न्यायालयाच्या आदेशानंतरही बांधकाम सुरू असल्याचा आरोपही त्यांनी केला. तसेच येत्या उन्हाळी अधिवेशनात विधिमंडळ अध्यक्षाच्या दालनात अनधिकृत बांधकामांच्या मुद्द्यावर बैठक घेणार असल्याचेही त्यांनी स्पष्ट केले.
