कल्याण – येथील एका पडझड झालेल्या इमारतीत एका १३ वर्षाच्या मुलीचा कुजलेल्या अवस्थेतील मृतदेह आढळून आला आहे. त्याचवेळी एका तरूणाचा मृतदेह कल्याण रेल्वे स्थानकाजवळील रुळावर आढळून आल्याने खळबळ उडाली आहे. प्रेमप्रकरणातून या घटना घडल्याचा प्राथमिक संशय पोलिसांनी व्यक्त केला आहे.
सिंडीकेट भागातील एका इमारतीमधून दुर्गंधी येऊ लागल्याने नागरिकांनी तेथे पाहणी केली. तेथे एका मुलीचा मृतदेह कुजलेल्या अवस्थेत मृतदेह आढळला. महात्मा फुले पोलिसांनी तातडीने या मुलीच्या नातेवाईकांचा शोध घेतला. ती १३ जानेवारीपासून बेपत्ता होती, असे तपासात आढळले. या मुलीच्या मृतदेहा जवळ पोलिसांना दोन मोबाईल आढळले. त्यामधील एक मोबाईल मृत अल्पवयीन मुलीचा होता. तर दुसरा मोबाईल रेल्वे मार्गावर उडी मारून आत्महत्या केलेल्या तरूणाचा असल्याचे आढळले. संबंधित तरूण जालना भागातील रहिवासी आहे. प्रेमप्रकरणातून त्याने अल्पवयीन मुलीची हत्या करून दुसऱ्या दिवशी स्वत: आत्महत्या केली असल्याचा संशय पोलिसांना आहे. महात्मा फुले पोलीस या प्रकरणाचा तपास करत आहेत.
