लोकसत्ता प्रतिनिधी
ठाणे : ठाण्यात मेट्रो चार या मार्गिकेच्या निर्माणाचे काम सुरू आहे. या कामादरम्यान, सुमारे १५ ते २० फुट उंचावरून एक सळई रस्त्यावरुन जाणाऱ्या वाहनात आरपार उभी शिरली. वाहन चालकापासून अवघ्या काही इंच अंतरावर ही सळई पडल्याने वाहन चालक आणि प्रवाशांचा जीव वाचला. परंतु या घटनेमुळे मेट्रोच्या सुरू असलेल्या कामातील हलगर्जी दिसून आली आहे.
ठाण्यात सध्या मुंबई महानगर प्रदेश विकास प्राधिकरणाकडून (एमएमआरडीए) वडाळा-घाटकोपर- कासारवडवली या मेट्रो चार मार्गिकेच्या निर्माणाचे काम सुरू आहे. त्यानुसार लाल बहादुर शास्त्री मार्गावरही प्राधिकरणाकडून विविध कामे सुरू आहेत. सोमवारी सकाळी या मार्गावरून वाहन चालक जितेंद्र यादव हे भांडुपहून तीन प्रवाशांना घेऊन कोलशेतच्या दिशेने जात होते. त्यांचे वाहन भारत पेट्रोल पंप येथे आले असता सुमारे १५ ते २० फुट उंचावरून एक लोखंडी सळई थेट वाहनात आरपार शिरली. ही सळई वाहन चालकापासून अवघ्या काही इंच अंतरावर पडली. त्यामुळे मोठी दुर्घटना टळली.
