लोकसत्ता प्रतिनिधी
ठाणे: राष्ट्रवादी काँग्रेसचे (शरद पवार गट) माजी नगरसेवक तसेच राष्ट्रवादीचे ठाणे जिल्हाध्यक्ष सुहास देसाई यांच्या विरोधात राबोडी पोलीस ठाण्यात गुन्हा दाखल करण्यात आला आहे. सरकारी कामात अडथळा आणल्या प्रकरणी हा गुन्हा दाखल करण्यात आला आहे.
आणखी वाचा-कल्याणमध्ये महिलेवर १५ जणांचा सशस्त्र हल्ला, तीन जण गंभीर जखमी
सुहास देसाई हे राष्ट्रवादीचे माजी नगरसेवक आहेत. राष्ट्रवादीमध्ये फूट पडल्यानंतर त्यांनी शरद पवार यांना समर्थन दिले आहे. तसेच त्यांच्याकडे राष्ट्रवादीचे ठाणे जिल्हाध्यक्ष पद आहे. दोन दिवसांपूर्वी राबोडी येथे महापालिकेचे कर्मचारी फेरीवाल्यांच्या अतिक्रमणावर कारवाई करत असताना, सुहास देसाई त्याठिकाणी आले. त्यांनी कारवाई रोखली तसेच कर्मचाऱ्यांना अर्वाच्य भाषेत शिवीगाळ आणि दमदाटी केली, असे महापालिकेच्या कर्मचाऱ्याने दिलेल्या तक्रारीत म्हटले आहे. या तक्रारीच्या आधारे सुहास देसाई यांच्या विरोधात राबोडी पोलीस ठाण्यात गुन्हा दाखल करण्यात आला आहे.
