ठाणे :शहरांमध्ये सकारात्मक बदल दिसू द्या!;मुख्यमंत्री एकनाथ शिंदे यांच्या अधिकाऱ्यांना सूचना

ठाणे आणि कळवा या दोन्ही शहरांना जोडणाऱ्या खाडीपुलावरील पोलीस मुख्यालय ते कळवा चौक आणि विटावा या मार्गिकेचे लोकार्पण रविवारी मुख्यमंत्री एकनाथ शिंदे यांच्या हस्ते झाले. या कार्यक्रमाला खासदार श्रीकांत िशदे, आमदार जितेंद्र आव्हाड, माजी महापौर नरेश म्हस्के, महापालिका आयुक्त अभिजीत बांगर उपस्थित होते.

ठाणे तसेच आसपासच्या शहरातील रस्ते वाहतूक कोंडीमुक्त कसे होतील, यासाठी एमएमआरडीए आणि महापालिका काम करीत आहे. शहरांमध्ये मेट्रोची कामे सुरू असून ठाण्यात शहरात मुख्य मेट्रोसह अंतर्गत मेट्रोचा प्रकल्पही राबविण्यात येणार आहे. मेट्रो सुरू झाल्यानंतर नागरिक वाहनांऐवजी मेट्रोने प्रवास करतील आणि त्यामुळे रस्त्यावर फारशी वाहने येऊन कोंडी होणार नाही, असेही मुख्यमंत्री एकनाथ शिंदे यांनी या वेळी बोलताना सांगितले. आम्ही लोकांसाठी सरकार बनविले असून हे सरकार जनतेसाठी काम करणार आहे. त्यामुळे जनतेच्या फायद्याचे जे काही असेल ते सर्व हे सरकार करणार आहे. त्यासाठी आमदार, खासदारांच्या सर्व सूचनांचा अंतर्भाव केला जाणार आहे, असेही ते म्हणाले. कोपरी रेल्वे पुलाची मार्गिकाही लवकरच सुरू केली जाणार आहे, असेही ते म्हणाले. विटावा आणि कोपरी पादचारी पुलाचे काम एमआरडीएने केले असून हा पूलही लवकर कसा खुला होईल. त्याकडे महापालिका आयुक्तांनी लक्ष दयावे, असे निर्देशही त्यांनी दिले.

प्रकल्पांची घोषणा
ठाणे तसेच आसपासची शहरे वाहतूक कोंडीमुक्त व्हावी यासाठी शहराबाहेरून ११०० ते १३०० कोटी रुपये खर्चून रस्ता तयार करण्यात येणार आहे. मुंबई फ्री वे हा रस्ता घाटकोपर येथील छेडानगपर्यंत येणार आहे. तो रस्ता पुढे ठाणे मार्गे फाऊंटनपर्यंत नेण्यात येणार आहे. याशिवाय, तीन हात नाका, कॅडबरी या महत्त्वाच्या जंक्शनवरील वाहतूक कोंडी कमी करण्यासाठी ग्रेड सेप्रेटर आणि गाडय़ा वळविण्यासाठी स्वतंत्र मार्गिका तयार करण्यात येणार आहेत. कोपरी रेल्वे पुलाची मार्गिकाही लवकरच सुरू केली जाणार आहे. ठाणे शहरात अंतर्गत मेट्रोचा प्रकल्पही राबविण्यात येणार असून त्यासाठी केंद्र सरकारही सकारात्मक आहे, अशी माहिती मुख्यमंत्री एकनाथ िशदे यांनी दिली. कळवा येथील ९० फुटी रस्ता मुंबई-नाशिक महामार्गाला जोडला तर त्या भागातील वाहतूक कमी होईल. त्यामुळे या मार्गिकेच्या जोडणीचे काम करण्यात यावे आणि कळवा नवीन खाडीपुलामुळे भविष्यात वाहतूक कोंडी होऊ नये म्हणून या पुलाची मार्गिका पटनीपर्यंत उतरविण्यात यावी, असेही निर्देशही त्यांनी दिले.

टोलेबाजी आणि शक्तिप्रदर्शन
कळवा नवीन खाडी पुलाची मार्गिका विटावा येथे उतरविण्यात आली आहे. परंतु या मार्गिकेच्या पुढेच सब-वे असल्यामुळे त्या ठिकाणी वाहतूक कोंडी होण्याची शक्यता आहे. ही कोंडी टाळण्यासाठी पुलाची मार्गिका पटनीपर्यंत नेणे गरजेचे आहे, असे मत राष्ट्रवादीचे आमदार जितेंद्र आव्हाड यांनी कार्यक्रमात बोलताना व्यक्त केले. त्यावर खासदार श्रीकांत शिंदे यांनी आव्हाड यांना प्रतिउत्तर देत टोला लगावला. मुख्यमंत्री एकनाथ शिंदे यांच्याकडे नगरविकास, एमएमआरडीए हे विभाग आहेत. या विभागाच्या आणि महापालिकेच्या माध्यमातून प्रकल्प राबविण्यात येत असून त्यासाठी आम्ही सक्षम आहोत. त्यामुळे तुमच्या अपेक्षा मुख्यमंत्र्यांकडेच असायला हव्यात, असा टोलाही त्यांनी आव्हाड यांना लगावला. तर लोकांच्या फायद्यासाठीच आम्ही हे सरकार बनविले असल्याचा टोला मुख्यमंत्री शिंदे यांनी आव्हाड यांना लगावला. पोलीस मुख्यालयासमोरील पुलाच्या मार्गिकेजवळ लोकार्पणाचा कार्यक्रम पार पडला. परंतु पुलाच्या दुसऱ्या टोकाला म्हणजेच कळवा चौकात राष्ट्रवादी आणि शिंदे गटाचे कार्यकर्ते जमले होते. या ठिकाणी दोन्ही कार्यकर्त्यांची घोषणाबाजी केल्याने तणावाचे वातावरण होते.

ठाणे आणि कळवादरम्यान तिसऱ्या खाडी पुलाचे, विटावा ते ठाणे पोलीस मुख्यालयादरम्यान तयार झालेल्या पहिल्या मार्गिकेचे लोकार्पण मुख्यमंत्री एकनाथ शिंदे यांच्या हस्ते रविवारी करण्यात आले. तसेच मुंब्रा वाय जंक्शन पूलदेखील नागरिकांच्या सेवेत दाखल झाला आहे.