अंबरनाथच्या चिखलोलीची उंची वाढलीच नाही, पाणी दिलासा देणारी योजना रखडलेलीच

धरणाची उंची वाढवण्याच्या कामासाठी धरण पूर्ण रिकामे करणे आवश्यक आहे. मात्र गेल्या काही वर्षात अनेकदा धरण रिकामे होण्यास वेळ लागतो. काही वर्षांमध्ये धरण रिकामे करण्यास विरोध झाला होता. शहरात पाणीटंचाईच्या झळा बसत असताना धरण रिकामे करण्याच्या निर्णयाला सहमती मिळू शकली नाही. त्यामुळे उंची वाढीचे काम रखडले होते. आता या प्रकल्पासाठी भूसंपादन आणि धरणाच्या उंची वाढीसाठीच्या ४० कोटींच्या निधीच्या प्रस्ताव तयार करण्यात आला आहे. मात्र हा प्रस्ताव गेली काही वर्षे मंजुरीच्या प्रतीक्षेत आहे. सुधारित प्रशासकीय मान्यता मिळूनही वेळेत निधी न मिळाल्याने ही योजना पूर्ण होऊ शकलेली नाही. परिणामी अंबरनाथकरांना आजही पाणी कपातीला सामोरे जावे लागते आहे.

अंबरनाथ शहराला कुठून किती पाणी

अंबरनाथ शहराला विविध स्त्रोतांच्या माध्यमातून पाणी पुरवठा केला जातो. बदलापुरातून वाहणाऱ्या उल्हास नदीवर महाराष्ट्र जीवन प्राधिकरणाच्या बॅरेज बंधाऱ्यातून ५० दशलक्ष लीटर, एमआयडीसीच्या जांभूळ केंद्रातून २० दशलक्ष लीटर तर चिखलोली धरणातून ६ दशलक्ष लीटर इतके पाणी पुरवले जाते. चिखलोली धरणातून ज्या भागाला पाणी दिले जाते त्यांना पाणी टंचाईचा सामना करावा लागतो. त्यामुळे इतर स्त्रोत नसताना किमान चिखलोली धरणाकडून अंबरनाथकरांना आशा आहे.

सध्यस्थिती काय

अंबरनाथ शहरात सध्याच्या घडीला पाणी टंचाईमुळे पाणी कपात लागू करण्यात आली आहे. अंबरनाथ पूर्वेत विविध भागांना एक दिवसाआड पाणी दिले जाते आहे. तर अंबरनाथ पश्चिमेतील काही भागात एक दिवसाआड पाणी पुरवठा केला जातो आहे. त्याचवेळी आसपासच्या शहरांमध्ये अशी कोणतीही पाणी कपात नाही. त्यामुळे नागरिकांत संताप आहे.

प्रतिक्रियाः धरणाच्या उंची वाढीच्या कामाला सुधारित प्रशासकीय मान्यता मिळाली आहे. निधीसाठी शासनाकडे पाठपुरावा सुरू आहे. पावसाळ्यानंतर धरणाच्या उंची वाढीच्या कामाला सुरुवात होईल. – आमदार डॉ. बालाजी किणीकर, अंबरनाथ.