ठाणे : कापूरबावडी आणि माजीवडा चौकातील वाहतूक कोंडी फोडण्यासाठी चक्राकार पद्धतीने वाहतूकीचे नियोजन करण्याचा निर्णय महापालिका आणि वाहतूक पोलिसांनी घेतला आहे. या चौकात मार्गिका निश्चित करुन वाहतूक बेट तयार केले जाणार आहे. तसेच पुलाखाली थांब रेषा तसेच इतर उपाययोजना केल्या जाणार असल्याचे महापालिकेने स्पष्ट केले. कापूरबावडी आणि माजिवडा जंक्शन येथे करण्यात आलेल्या वाहतूक बदलांचा आढावा शुक्रवारी सकाळी ठाणे महापालिका आयुक्त अभिजीत बांगर आणि पोलीस उपायुक्त डॉ. विनयकुमार राठोड यांनी संयुक्त पाहणी दौऱ्यात केला. या दौऱ्यात माजिवडा आणि कापूरबावडी जंक्शन या ठिकाणी वाहतूक मार्गिका निश्चित करणे आवश्यक आहे. त्यासाठी एक वाहतूक बेट विकसित करून त्याची अमलबजावणी करण्याची सूचना आयुक्त बांगर यांनी दिली. त्यानंतर पुलाखाली थांबरेषा तसेच इतर उपाययोजना केल्या जाणार असल्याचे महापालिकेने स्पष्ट केले. यावेळी एलबीएस मार्गाचीही पाहणी अधिकाऱ्यांनी केली. हेही वाचा >>> रस्ते कामांचे लेखापरिक्षणानंतरच कंत्राटदारांना देयके द्या; ठाणे महापालिका आयुक्तांचे आदेश अपलॅब चौकात रस्त्याचे काँक्रीटीकरण जवळपास पूर्ण झाले आहे. तेथे मेट्रो मार्गिकेच्या खांबाभोवती छोटेखानी वाहतूक बेट तयार करण्याचे निर्देशही आयुक्त बांगर यांनी दिले. त्यामुळे पुलाखालील भागाचे सौंदर्यीकरण होईल आणि वाहतूकीचे परिचलनही व्यवस्थित होईल असा दावा महापालिकेने केला. कापूरबावडी नाका, माजिवडा नाका येथील उड्डाणपुलाखाली मोकळ्या जागांवर गर्दुल्ल्यांचा वावर असतो. तसेच अनधिकृत वाहनेही उभी केली जातात. त्यास आळा बसवा यासाठी अधिकृत वाहनतळ केले जाणार आहे. त्यासाठी निविदा प्रक्रिया सुरू झाली आहे. मुंबई नाशिक महामार्गावरून घोडबंदर मार्गावर जाणाऱ्या अवजड वाहनांना कॅडबरी जंक्शन पुलाखालून उजवे वळण देण्यात आले आहे. या बदलामुळे माजिवडा जंक्शनवरील अवजड वाहनांचा ताण कमी झाल्याचा दावा महापालिकेने केला आहे. असे असले तरी कॅडबरी जंक्शन येथे वाहतूक कोंडी होत असल्याचे वाहन चालकांचे म्हणणे आहे.
