टपाल कार्यालयांच्या दुरावस्थेमुळे नागरिक त्रस्त; आमदार संजय केळकर यांची अधिकाऱ्यांसोबत बैठक

कोलशेत येथील सॅण्डोज बाग टपाल कार्यालयाचे नामकरण कोलशेत टपाल कार्यालय करण्याबाबत केळकर यांनी अधिकाऱ्यांना सूचना केली आहे. पूर्वीचे सॅण्डोज हे नावच आता अस्तित्वात नसल्याने टपालाची जागा कोलशेत भागात असल्याने त्याचे नामकरण करण्याबाबत त्यांनी सूचना केली. तसेच जे.के. ग्राम टपाल कार्यालयासाठी जी जागा उपलब्ध केली आहे. ती तळघरात असल्याने ती बदलून पालिकेकडे नवीन जागेसाठी पाठपुरावा करणार असल्याचे केळकर यांनी सांगितले. नौपाडा भागातील टपाल कार्यालय हे दमाणी इस्टेट येथे गेली ५० वर्षे होते. इमारतीच्या पुनर्विकासानंतर विकासकाने त्याच जागेत कार्यालयासाठी जागा देण्याबाबत यावेळी बैठकीत चर्चा करण्यात आली. वागळे इस्टेट येथे सध्या टपाल कार्यालय नसून १९८४ पासून असलेल्या टपाल कार्यालय ठाणे स्थानकाजवळील कार्यालयातून कार्यरत असल्याने नागरिकांना गैरसोईचे होत आहे. त्यामुळे हे कार्यालय वागळे इस्टेट येथे पुन्हा स्थलांतरीत करण्याबाबत प्रयत्न करणार असल्याची माहिती केळकर यांनी दिली. टपाल कार्यालयाची उपयुक्तता गरीब, मध्यमवर्गीयांना मोठ्या प्रमाणात असते. संपूर्ण शहरात याबाबत दुरावस्था असून नागरिकांनी त्रस्त होऊन निवेदने दिली होती. पुढील काळात सर्व टपाल कार्यालये सक्षम होण्यासाठी पाठपुरावा करणार असल्याचे केळकर यांनी स्पष्ट केले.