ठाणे : नवी मुंबईत आयोजित करण्यात आलेल्या ‘कोल्ड प्ले’या कॉन्सर्टच्या तिकिटांची दुप्पट ते तिप्पट चढ्या दराने विक्री केली जात असल्याचा प्रकार समोर येत आहे. तिकीट विक्रीसाठी समाजमाध्यमांचा वापर केला जात आहे. विशेष म्हणजे चढ्या दराने तिकिटाची विक्री होत असतानाही अनेक जण हे तिकीट खरेदी करण्यासाठी इच्छुक असल्याचे दिसत आहे.
हेही वाचा >>> कोल्ड प्ले निमित्त महामुंबईत सज्जतेची आखणी; कार्यक्रमासाठी नवी मुंबईत येणारा दहा हजारहून अधिक वाहने
नवी मुंबई येथील डाॅ. डी. वाय. पाटील स्टेडियममध्ये तीन दिवस ‘कोल्ड प्ले’चे आयोजन करण्यात आले आहे. मागील अनेक दिवसांपासून कोल्ड प्ले काॅन्सर्टच्या तिकिटांच्या काळा बाजाराविषयी चर्चा रंगल्या होत्या. नवी मुंबईत हा कार्यक्रम असल्याने देशभरातील विविध भागातून तरुण-तरुणी तसेच विदेशी नागरिक नवी मुंबईत येऊ लागले आहेत. तिकीट विक्री पूर्ण झाली असल्याने अनेकांना इच्छा असूनही तिकीट मिळू शकले नाहीत. त्यामुळे आता या तिकिटांची काही जण चढ्या दराने पुनर्विक्री करत असल्याचा प्रकार समोर येत आहे. वेगवेगळ्या समाजमाध्यमांचा वापर करून या तिकिटांची विक्री केली जात आहे. ‘लाऊंज’ या सर्वात महागड्या तिकिटाचा दर लाखाच्या घरात गेला आहे. त्याची अधिकृत किंमत ३५ हजाराच्या आसपास होती, तर इतर ३ ते ४ हजार रुपयांच्या तिकीट पुनर्विक्री करण्यासाठी १० ते १५ हजार रुपयांची मागणी केली जात होती. इतर आसन व्यवस्थांच्या तिकिटांबाबतीतही अशीच परिस्थिती होती.
नवी मुंबई गुन्हे अन्वेषण शाखेकडे तिकिटाच्या काळा बाजाराबाबतची कोणतीही तक्रार अद्याप आलेली नाही. तिकिटाचा काळा बाजार होत असल्याची तक्रार आल्यास कारवाईची प्रक्रिया सुरू केली जाईल. – अमित काळे, उपायुक्त, गुन्हे अन्वेषण शाखा, नवी मुंबई पोलीस.
