ठाणे : एका चेंडूत दोन धावा, अन् आयोजक सिद्धू अभंंगेसोबत संघाचा राडा, चाकू भिरकावल्याचा दोन्ही गटांकडून दावा, व्हिडीओ वायरल

संत तुकाराम मैदानात सोमवारी सायंकाळी ६ ते रात्री १० यावेळेत क्रिकेट सामन्यांचे आयोजन करण्यात आले होते. यावेळेत आठ संघ खेळणार होते. सामना पाहण्यासाठी आयोजक सिद्धू अभंगे आणि त्याचे सहकारी येथील व्यासपीठावर होते. ठाण्यातील एका संघाला शेवटच्या षटकामध्ये १३ धावांची आवशक्यता होती. त्यावेळी पहिल्याच चेंडूत सहा धावा मिळाल्या. त्यानंतर दुसऱ्या चेंडूवर दोन धावा करताना एक खेळाडू धावचित झाला. पंचाच्या निर्णयावर संघाने विरोध दर्शविला. त्यामुळे सामना अर्धातास स्थगित झाला. चित्रीकरण पाहिले असता, पंचांचा निर्णय योग्य असल्याचे स्पष्ट झाले. सामन्यात धावा केल्यानंतर आता एका चेंडूमध्ये दोन धावांची आवश्यकता होती. त्याचेवळी खेळाडू बाद झाला. जिंकलेल्या संघाने जल्लोष सुरू करताच, वाद निर्माण झाला. त्यानंतर पराभूत संघ आणि आयोजकांमध्ये वादाचे रुपांतर हाणामारीमध्ये झाले.

आयोजक सिद्धेश अभंगे याने दिलेल्या तक्रारीत म्हटले आहे की, संघातील एकाने त्यांच्या दिशेने चाकू भिरकावला होता. तसेच व्यासपीठावरील कुंड्या आणि पारितोषिकांची देखील नासधूस करण्यात आली. तर क्रिकेट संघातील खेळाडूने दिलेल्या तक्रारीमध्येही सिद्धू अभंगे याने चाकू काढून आमच्या दिशेने आल्याचे म्हटले आहे. या प्रकरणात दोन्ही बाजूकडून तक्रारी दाखल झाल्याने कोपरी पोलीस ठाण्यात गुन्हे दाखल झाले आहेत. दरम्यान, बाचाबाची आणि हाणामारीचे चित्रीकरण आता समाजमाध्यमांवर प्रसारित होत आहे.