ठाणे : भिवंडी न्यायालयातील कनिष्ठ लिपीक सरफराज शेख (४०) याला दोन हजार रुपयांची लाच घेतल्याप्रकरणी मंगळवारी ठाणे लाचलुचपत प्रतिबंधक विभागाने अटक केली आहे. तक्रारदार यांचे प्रकरण कारवाईसाठी पुढे पाठविण्याकरिता त्याने ही लाच मागितल्याचे पोलिसांनी सांगितले.
तक्रारदार यांचे भिवंडी न्यायालयात चार प्रकरणे दाखल आहेत. याप्रकरणांची नोंदणी करून ती प्रकरणे पुढील करवाईकरिता पाठविण्यासाठी भिवंडी सह दिवाणी न्यायालयातील कनिष्ठ लिपीक सरफराज याने तक्रारदार यांच्याकडून सुमारे महिन्याभरापूर्वी दोन हजार रुपयांची मागणी केली होती. याप्रकारानंतर तक्रारदार यांनी थेट ठाणे लाचलुचपत प्रतिबंधक विभागाकडे तक्रार दाखल केली. याप्रकरणाची पोलिसांनी पडताळणी केली असता, सरफराजने लाचेची मागणी करून ती घेतल्याचे स्पष्ट झाले. त्यानंतर सरफराज विरोधात शांतीनगर पोलीस ठाण्यात गुन्हा दाखल करण्यात आला असून पोलिसांनी त्याला अटक केली.
