आंतरराज्य टोळीतील दोघांना अटक
प्रतिनिधी, डोंबिवली
तामिळनाडूसह महाराष्ट्रातील अनेक शहरांत चोऱ्या, घरफोडय़ा, अपहरण, लुटमारीसारखे गुन्हे करणाऱ्या एस मनिकंडन व प्रभू नाडर या दोघांना कल्याण पोलिसांनी तामीळनाडूमधून अटक केली आहे. या दोघांविरोधात तामिळनाडू राज्यात १२ तर महाराष्ट्र राज्यात पाच गुन्हे दाखल असून त्यापैकी चार गुन्हे कल्याण-डोंबिवली तर एक गुन्हा मुंब्रा भागातील आहे. या गुन्ह्य़ांत वापरलेली कार, हत्यारे आणि लुटून नेलेल्या वस्तूही जप्त करण्यात आल्या आहेत. तसेच या दोघांचे अन्य साथीदार फरार असून पोलीस त्यांचा शोध घेत आहेत.
कल्याण-डोंबिवली परिसरातील चोरीचे आणि त्यासाठी जीवघेणा हल्ला करण्याचे प्रकार या टोळीकडून सुरू होते. त्यामुळे गेल्या काही दिवसांपासून कल्याण पोलीस या टोळीच्या मागावर होती. अखेर पोलीस उपायुक्त संजय जाधव यांच्या नेतृत्वाखाली मानपाडा पोलीस ठाण्याचे वरिष्ठ पोलीस निरीक्षक गौतम रणदिवे यांच्या पथकाने दिव्यातून लुटारूंची कार जप्त केली. तामीळनाडू राज्यातील मदुराई परिसरातील ही कार असून लुटारू टोळीने तेथून चोरून आणल्याचे तपासात पुढे आले. त्यानुसार, या पथकाने या टोळीचा माग काढण्यासाठी तामीळनाडू राज्यातल्या कुडनकुलन भागात साप़ळा रचला आणि तेथून एस. मनिकंडन आणि प्रभू नाडर या दोघांच्या मुसक्या आवळल्या आहेत, अशी माहिती पोलीस उपायुक्त संजय जाधव यांनी दिली.
२२ जून रोजी मानपाडा रोडला शंकेश्वर नगर येथे राहणारी वर्षां जोशी ही महिला रात्रीच्या सुमारास शनिमंदिर रोडने पायी जात असताना कारमधून आलेल्या लुटारूंनी या महिलेच्या गळ्यातील मंगळसूत्र खेचून पळ काढला होता. या प्रकरणी मानपाडा पोलीस ठाण्यात गुन्हा नोंदविण्यात आला होता. ही घटना ताजी असतानाच दोन दिवसांनी मानपाडा रोडवरील संघवी गार्डन-पिंपळेश्वर येथे पहाटेच्या सुमारास ब्रिजेश मौर्या यांच्यावर प्राणघातक हल्ला चढवून सोनू म्हात्रे यांच्या कारची तोडफोड करण्यात आली होती. हल्लेखोरांनी लूटमारीच्या उद्देशाने हा हल्ला चढवून कारमधून पलायन केले होते. त्यानतंर ५ जुलै रोजी डोंबिवली पश्चिमेतील दोन महिलांचे कारमधून अपहरण करत त्यांच्याकडील मोबाइल आणि दागिन्यांची लूट करण्यात आली होती. या प्रकरणी देवीपाडा परिसरात राहणारे मितेश पटेल यांनी दिलेल्या तक्रारीवरून विष्णुनगर पोलीस ठाण्यात गुन्हा दाखल करण्यात आला होता.
हजारपेक्षा जास्त प्रीमियम लेखांचा आस्वाद घ्या ई-पेपर अर्काइव्हचा पूर्ण अॅक्सेस कार्यक्रमांमध्ये निवडक सदस्यांना सहभागी होण्याची संधी ई-पेपर डाउनलोड करण्याची सुविधा
