९६व्या अखिल भारतीय मराठी नाटय़ संमेलनानिमित्त कलाकारांचा संवाद
प्रतिनिधी ठाणे
ठाणे शहरात ९६वे अखिल भारतीय मराठी नाटय़ संमेलन आयोजित करण्यात आले असून शहरात होणाऱ्या या संमेलनाची पुरेपूर माहिती तरुणाईला व्हावी या उद्देशाने नाटय़ कलाकारांनी तरुणाईशी संवाद साधण्याचा प्रयत्न सुरू केला आहे. नाटय़ परिषद ठाणे शाखा आणि टॅग या कलाकारांच्या संस्थेच्या वतीने संयुक्त विद्यमाने हा उपक्रम हाती घेण्यात आला आहे. या उपक्रमांतर्गत शहरातील ज्ञानसाधना महाविद्यालय, जोशी-बेडेकर महाविद्यालय, आर. जे. ठाकूर महाविद्यालय, जीएसएस कॉलेज, आनंद विश्व गुरुकुल महाविद्यालय, केबीपी महाविद्यालय आणि एन.के.टी. महाविद्यालय या महाविद्यालयांतील तरुणांशी नाटय़ कलाकारांनी संवाद साधला.
शैक्षणिक संस्थेच्या सामाजिक दायित्वाचा एक उपक्रम म्हणून विद्यार्थी स्वयंसेवकांची फौज उभी करून या ऐतिहासिक समारंभास योगदान देण्याचे या वेळी निश्चित करण्यात आले. याच निश्चयपूर्तीच्या तयारीसाठी ठाण्यातील मान्यवर नाटय़ कलाकार आपल्या भेटीला या उपक्रमांतर्गत प्रत्येक महाविद्यालयातील १०० विद्यार्थी नाटय़ स्वयंसेवकांचा नाटय़ संमेलनाच्या आयोजन समितीबरोबर मार्गदर्शन संवाद आयोजित करण्यात आला. विजू माने, मिलिंद सफई, नयन जाधव, प्रशांत विचारे, संतोष जुवेकर, डॉ. अरुंधती भालेराव, कौस्तुभ भामरीकर, सतीश आगाशे, संपदा जोगळेकर यांच्यासह अनेक मान्यवरांनी या उपक्रमात सहभाग घेत विद्यार्थ्यांशी संवाद साधला. ठाण्यात होणारे हे संमेलन यशस्वी करण्यासाठी तरुणाईने सर्वाधिक प्रयत्न करण्याची गरज असून हे संमेलन तरुणांचे संमेलन होईल असा प्रयत्न करण्याचे आवाहन या वेळी या कलाकारांनी केले. तसेच विद्यार्थ्यांना संपूर्ण संमेलनाच्या आयोजनाची रूपरेखा स्पष्ट करून आयोजनासाठी निर्मिलेल्या विविध समित्यांवर काम करण्यासाठी व त्यातून मिळालेल्या अनुभवातून नाटय़ चळवळ ठाणे नगरीत भक्कम करण्यासाठी आवाहन केले. अशा कार्यक्रमांच्या आयोजनात विद्यार्थ्यांच्या सहभागातून विद्यार्थ्यांना अनेक कलाकारांना प्रत्यक्ष भेटण्याची संधी मिळेल तसेच त्यांचा आत्मविश्वास वृद्धिंगत होऊन भविष्यातील नाटय़ चळवळीला सक्षम नेतृत्व लाभेल असा आत्मविश्वास महाविद्यालयाच्या वतीने स्पष्ट करण्यात आले.
हजारपेक्षा जास्त प्रीमियम लेखांचा आस्वाद घ्या ई-पेपर अर्काइव्हचा पूर्ण अॅक्सेस कार्यक्रमांमध्ये निवडक सदस्यांना सहभागी होण्याची संधी ई-पेपर डाउनलोड करण्याची सुविधा
