ठाणे : ठाण्यातील शिवसेनेचे माजी जिल्हाप्रमुख रघुनाथ मोरे यांच्या कुटुंबियांची गुरुवारी उपमुख्यमंत्री एकनाथ शिंदे यांनी भेट घेऊन त्यांचे सांत्वन केले. यावेळी शिंदे यांनी रघुनाथ मोरे यांच्यासोबतच्या आठवणींना उजाळा दिला. आनंद दिघे यांच्या निधनानंतर रघुनाथ मोरे यांनी आम्हा शिवसैनिकांना आधार दिला होता. त्यांचे मार्गदर्शन आम्हाला नेहमी लाभत होते. त्यांच्या निधनाने शिवसेना कुटुंबाची हानी झाली आहे असे शिंदे म्हणाले.
माजी जिल्हाप्रमुख रघुनाथ मोरे (७६) यांचे रविवारी अल्पशा आजाराने निधन झाले होते. शिवसेनेचे दिवंगत नेते आनंद दिघे हे हयात असताना रघुनाथ मोरे यांच्याकडे ठाणे शहरप्रमुख पदाची जबाबदारी होती. आनंद दिघे यांच्या निधनानंतर शिवसेनाप्रमुख बाळासाहेब ठाकरे यांनी मोरे यांच्यावर ठाणे जिल्हाप्रमुख पदाची जबाबदारी दिली होती. रघुनाथ मोरे हे जिल्हा प्रमुख असताना त्यांच्या मार्गदर्शनाखाली शिवसेनेने ठाणे महापालिका निवडणूक लढविली होती. या निवडणूकीत शिवसेनेने यश संपादित केले होते. परंतु रघुनाथ मोरे यांचाही अपघात झाला. त्यानंतर ते राजकारणापासून अलिप्त राहिले होते. असे असले तरी ठाणे जिल्ह्यातील नेते, पदाधिकारी रघुनाथ मोरे यांची भेट घेत असत.
रविवारी त्यांच्या निधनानंतर शिवसेनेकडून शोक व्यक्त केला गेला. गुरुवारी उपमुख्यमंत्री एकनाथ शिंदे यांनी रघुनाथ मोरे यांच्या कुटुंबियांची त्यांच्या ठाण्यातील पाचपाखाडी येथील निवासस्थानी जाऊन भेट घेतली. त्यानंतर त्यांनी माध्यमांशी संवाद साधला. आनंद दिघे यांच्या निधनानंतर आम्हाला रघुनाथ मोरे यांनी आधार दिला. संघटना वाढविण्यासाठी त्यांनी अहोरात्र मेहनत घेतली. ते प्रत्येकाला आपल्या कुटुंबातील सदस्य मानत होते. बाळासाहेब ठाकरे आणि आनंद दिघे यांचे विचार मानणारे ते कडवट शिवसैनिक होते. त्यांच्या निधनाने शिवसेना परिवाराची हानी झाली आहे. मोरे यांच्या कुटुंबाच्या पाठीशी आम्ही नेहमी उभे राहू असे शिंदे म्हणाले.
