लाडकी बहिण योजना बंद नाही होणार, उपमुख्यमंत्री एकनाथ शिंदे यांची ग्वाही

मी मुख्यमंत्री असताना अनेक निर्णय घेतले. मी अडीच वर्ष पायाला भिंगरी लावून फिरायचो. अडीच वर्षांत कधीच मला थकवा आला नाही. कारण, लाडक्या भाऊ आणि बहिणींमुळे मला उर्जा मिळायची. आतापर्यंतच्या कधीच इतके निर्णय घेतले गेले नव्हते असेही शिंदे यांनी सांगितले. मी सर्वसामान्यांचा मुख्यमंत्री म्हणून काम केले. मला या राज्यात अडीच कोटी लाडक्या बहिणींचा लाडका भाऊ म्हणून ओळख मिळाली. ही ओळख सर्वात मोठी असल्याचेही ते म्हणाले.

गरीबी काय आहे याची जाणिव आम्हाला आहे. त्यामुळे गरिबांना, सर्वसामान्यांना आपल्या शासनाच्या माध्यमातून काही मदत मिळावी यासाठी आम्ही योजना सुरू केल्याचे त्यांनी सांगितले. पंतप्रधान नरेंद्र मोदी यांनी ८० कोटी नागरिकांना मोफत धान्य देण्याचा निर्णय घेतला. या पूर्वी काही लोक म्हणायचे गरिबी हटाव, पण गरिबी हटली नाही उलट गरिब हटला होता असा टोला त्यांनी नाव न घेता काँग्रेसला लगावला. पंतप्रधान नरेंद्र मोदी यांनी गरिबी हटविली. मोदी यांनी महिलांना आत्मनिर्भर केले आहे असेही शिंदे म्हणाले.

बाळासाहेबांचे विचार, बाळासाहेबांची शिवसेना आणि धनुष्यबाण गहाण टाकण्याचे काम त्यांनी केले होते. ते पाप धुण्यासाठी मी कुंभमेळ्याला गेलो होतो. हे लोक पाप लपविण्यासाठी लंडनमध्ये जातात असा आरोप शिंदे यांनी उद्धव ठाकरे यांच्यावर केला.आमचे सरकार संवेदनशील आहे. हे प्रकरण जलदगती न्यायालयात घेऊन नराधमाला फाशीची शिक्षा झाली पाहिजे, त्यापुढे कोणीही आमच्या लाडक्या बहिणीवर अत्याचार करण्याची हिमंत कोणी करता कामा नये अशा प्रकारचे काम आमचे सरकार करणार आहे असे उपमुख्यमंत्री एकनाथ शिंदे म्हणाले.