डोंबिवली शहराचा पाणी पुरवठा मंगळवारी बंद

डोबिवली पूर्व आणि पश्चिम भागाचा पाणी पुरवठा मंगळवारी बंद राहणार असल्याने दुसऱ्या दिवशी कमी दाबाने पाणी येण्याची शक्यता आहे. त्यामुळे नागरिकांनी एक दिवस पुरेल इतका पाणी साठा करून ठेवण्याचे आवाहन पालिकेतर्फे करण्यात आले आहे.

हेही वाचा : डोंबिवली जवळील अप्पर कोपर रेल्वेस्थानकातील प्रवाशांचा रेल्वे मार्गातून प्रवास

डोंबिवली पूर्वेतील फ, ग आणि पश्चिमेतील ह प्रभाग हद्दीतील अनेक ठिकाणच्या पाणी पुरवठा करणाऱ्या वितरण वाहिन्यांवर गळती सुरू आहे. हे गळतीचे पाणी रस्त्यावरून वाहते. पालिकेकडून सकाळ, दुपार, संध्याकाळी पाणी पुरवठा सुरू झाला की पाणी वितरण वाहिन्यांमधून गळती असलेल्या भागातून अधिकचे पाणी वाहून जाते. काही ठिकाणी व्हाॅल्व्हमध्ये बिघाड असल्याने त्या ठिकाणाहून पाण्याचे कारंजे सतत उडत असतात. यामुळे शेकडो लीटर पाणी वाया जाते. रस्त्यांवरून पाणी वाहून जात असल्याने अनेक भागात नागरिकांना रस्त्यावर होणाऱ्या चिखलामुळे चालणे अवघड होऊन जाते. दुचाकी या भागात घसरून पडतात. पाणी गळती विषयी नागरिकांच्या पालिकेतील तक्रारी वाढल्या होत्या.

हेही वाचा : MNS in Thane : ठाणे जिल्ह्यात मनसेला उतरती कळा

गेल्या दोन महिन्यापासून विधानसभा निवडणूक कामात कल्याण डोंबिवली पालिकेचा कर्मचारी वर्ग व्यस्त होता. त्यामुळे ही पाणी गळतीची कामे पाणी पुरवठा अधिकाऱ्यांना तातडीने हाती घेणे शक्य होत नव्हते. आता निवडणुका संपल्याने पाणी पुरवठा विभागाच्या अधिकाऱ्यांनी तातडीने ही दुरुस्तीची कामे हाती घेतली आहेत.