ठाणे : खोपट येथील एका खासगी रुग्णालयाच्या बांधकामादरम्यान रुग्णालय प्रशासनाने पिंपळाचे वृक्ष तोडल्याचा प्रकार समोर आला आहे. याप्रकरणी रुग्णालय व्यवस्थापकांविरोधात नौपाडा पोलीस ठाण्यात गुन्हा दाखल करण्यात आला आहे. महापालिकेच्या वृक्षप्राधिकरण विभागातील अधिकाऱ्याने दिलेल्या तक्रारीच्या आधारे हा गुन्हा दाखल करण्यात आल्याची माहिती पोलिसांनी दिली.
हेही वाचा – डोंबिवलीत शास्त्रीनगर रुग्णालयात प्रसूती विभागातील महिलांचे एक हजार दिवस समुपदेशन
खोपट येथील एसटी महांडळाच्या बसथांब्याजवळ एका खासगी रुग्णालयाचे बांधकाम सुरू होते. त्यावेळी रुग्णालय प्रशासनाने रुग्णालयाच्या आवारात असलेले एक पिंपळाचे वृक्ष तोडले होते. त्याची तक्रार डिसेंबर महिन्यात मनसेच्या एका पदाधिकाऱ्याने ठाणे महापालिकेच्या वृक्षप्राधिकरण विभागाकडे केली होती. या तक्रारीच्या आधारे वृक्ष प्राधिकरणाच्या अधिकाऱ्यांनी त्याठिकाणाची पाहणी केली असता, तोडलेल्या पिंपळाच्या वृक्षाचा बुंधा आढळून आला. त्यामुळे येथे वृक्ष तोडण्यात आल्याचे स्पष्ट झाले. त्यानंतर मंगळवारी वृक्ष प्राधिकरणाच्या अधिकाऱ्यांनी नौपाडा पोलीस ठाण्यात त्यांसदर्भात तक्रार दाखल केली. या तक्रारीच्या आधारे रुग्णालय व्यवस्थापकांविरोधात गुन्हा दाखल करण्यात आला आहे.
