डायघर भागात अलताफ मोहम्मद समिउल्लाह अन्सारी (२६) याने रागाच्या भरात स्वतःच्या दीड वर्षीय मुलीची जमीनीवर आपटून हत्या केल्याचा प्रकार उघडकीस आला. याप्रकरणी शिळडायघर पोलीस ठाण्यात गुन्हा दाखल करण्यात आला असून पोलिसांनी अलताफ याला अटक केली आहे. डायघर येथील अभयनगर परिसरात अलताफ हा त्याची पत्नी आणि दीड वर्षाच्या मुलीसोबत राहत होता.
हेही वाचा >>> ठाण्याच्या बाळकुम परिसरात लिफ्ट कोसळून ६ कामगारांचा मृत्यू, दोघे गंभीर जखमी
अलताफ मजूरीची कामे करतो. त्याला मद्याचे व्यसन असून त्याचे पत्नीसोबत वाद होत होते. अशाचप्रकारे १५ दिवसांपूर्वी अलताफ आणि त्याच्या पत्नीमध्ये वाद झाला होता. या वादातून ८ सप्टेंबरला अलताफ याने मुलीला आणि पत्नीला घराबाहेर काढले. त्यानंतर मुलीला उचलून अंगणातील जमीनीवर आपटले. या घटनेत मुलीच्या डोक्याला गंभीर दुखापत झाली. तिला रुग्णालयात नेले असता, डॉक्टरांनी तिला मृत घोषित केले. याप्रकरणी त्याच्या पत्नीने रविवारी दिलेल्या तक्रारीवरून शिळडायघर पोलीस ठाण्यात अलताफविरोधात गुन्हा दाखल करण्यात आला असून पोलिसांनी त्याला अटक केली आहे.