ठाणेकरांची कचरा कोंडी

वागळे इस्टेट भागातील सीपी तलाव परिसरात ठाणे महापालिकेचे कचरा हस्तांतरण केंद्र आहे. या ठिकाणी शहरातील विविध भागातून संकलित होणारा कचरा आणला जातो आणि त्यानंतर त्याचे वर्गीकरण केले जाते. यानंतर तो डायघर येथे नेला जातो. असे असले तरी याठिकाणी कचऱ्याचे ढिग लागले आहेत. या कचरा हस्तांतरण केंद्राजवळ लोकवस्ती, मोठमोठे गृहसंकुले तसेच औद्योगिक कंपन्या आहेत. कचरा हस्तांतरण केंद्रामुळे परिसरात पसरलेल्या दुर्गंधी आणि घाणीच्या साम्राज्यामुळे स्थानिक नागरिक हैराण आहेत. हे कचरा हस्तांतरण केंद्र हटविण्याची मागणी नागरिकांकडून वारंवार होत आहे.

शिवसेना (शिंदे गट) पदाधिकारी राम रेपाळे यांनीही यापुर्वी हे केंद्र बंद करण्याची मागणी पालिकेकडे केली होती. यामुळे पालिका आयुक्त सौरभ राव यांनी काही महिन्यांपुर्वी हा परिसर कचरामुक्त करण्याची घोषणा केली होती. त्यासाठी परिसरात वर्षानुवर्षे साठलेला कचरा उपसण्याचे काम सुरू केले होते. परंतु, पालिका अद्यापही हा परिसर कचरामुक्त करू शकलेली नाही. या केंद्रातील कचऱ्याच्या ढिगाला शुक्रवारी मोठी आग लागली. या आगीच्या धुराचे लोट परिसरात पसरल्यामुळे आजूबाजूच्या परिसरात राहणाऱ्या नागरिकांना या भागात असलेल्या कंपनीमधील कर्मचाऱ्यांना याचा खूप त्रास झाला. शिवसेना (शिंदे गट) पक्षाचे खासदार नरेश म्हस्के आणि काही पदाधिकाऱ्यांनी घटनास्थळी धाव घेऊन पालिका अधिकाऱ्यांना फैलावर घेतले. यापुढे या केंद्रावर एकही कचरा गाडी आणू नका आणि गाडी आणण्याचा प्रयत्न केला तर, गाड्या फोडून टाकू असा इशारा शिंदे गटाने यावेळी दिला. या इशाऱ्यानंतर रविवारी वागळे इस्टेट भागात घंटा गाड्या आल्या नाही. शहरातील विविध भागातील सोसायट्यांबाहेर ड्रममध्ये कचरा जमा झाला आहे आणि परिसरातील कचराकुंडी जवळ देखील कचरा पसरला आहे.

भाजपाचा आंदोलनाचा इशारा

ज्ञानेश्वरनगर परिसरात पाईप लाईनजवळ रस्त्यालगत कचरा कुंडी आहे. रविवारी सकाळी या कचरा कुंडीजवळ मोठ्याप्रमाणात कचरा पडल्याचे दिसून आले. हा कचरा रविवारी दुपारनंतर रस्त्यापर्यंत आला होता. यामुळे वाहतूकीस अडथळा निर्माण होत होता. तसेच परिसरात दुर्गंधी पसरली होती. अशीच परिस्थिती तीन पेट्रोल पंप परिसरात, वागळे इस्टेट भागात, लोकमान्य नगर परिसरासह आणखी बऱ्याच ठिकाणी दिसून आली. दरम्यान,या प्रश्नाकडे भाजपाचे महापालिकेतील माजी गटनेते नारायण पवार यांनी लक्ष वेधले असून, महापालिका प्रशासनाकडे तातडीने तोडगा काढण्याची मागणी केली. हा कचरा हटविला नाही तर, आंदोलनाचा इशारा त्यांनी दिला आहे.