बदलापूरः डोंगराला लागलेली आग थेट गोठ्यापर्यंत पोहोचल्याने मुरबाड तालुक्यातील विंढे गावात पाच म्हशींचा दुर्दैवी मृत्यू झाला आहे. वसंत चौधरी या शेतकऱ्याच्या शेतातील गोठ्याला मंगळवारी दुपारी वणव्यामुळे मोठी आग लागली. या आगीत पाच गाभण म्हशिंचा होरपळून दुर्दैवी मृत्यू झाला.
हेही वाचा – बनावट कागदपत्रांच्या आधारे कल्याणमधील काॅसमाॅस बँकेची सहा कोटीची फसवणूक
गावापासून काही अंतरावर चौधरी यांच्या शेतात जनावरांचा गोठा आहे. मंगळवारी दुपारच्या सुमारास बाजूच्या डोंगराला लागलेल्या वणव्याची आग चौधरी यांच्या गोठ्यापर्यंत पोहोचली होती. या आगीत संपूर्ण गोठा जळून खाक झाला. यावेळी म्हशींसोबत वैरणही जळून खाक झाले. या घटनेत चौधरी यांच्यावर मोठा दुःखाचा डोंगर कोसळला असून आधीच हालाखीची परिस्थिती असलेल्या चौधरी यांना नुकसान भरपाई मिळावी अशी मागणी ग्रामस्थांनी केली आहे. या घटनेनंतर गावातील तलाठ्यांनी घटनास्थळाचा पंचनामा केला.
