ठाणे : पूर्व द्रुतगती महामार्गावरील कॅडबरी जंक्शन भागात पाच वाहनांची एकमेकांना धडक बसली. या विचित्र अपघातात दोन जण जखमी झाले आहेत. भरत चव्हाण (४७) आणि दीपक सिंह (३५) अशी जखमींची नावे आहेत. दोन टेम्पो, मोटार, ट्रक आणि डम्पर ही वाहने एकमेकांना धडकली आहेत. या अपघातानंतर महामार्गावर वाहनांच्या रांगा लागल्या होत्या.
हेही वाचा >>> रुंंदीकरण केलेल्या ठाण्यातील रेल्वे फलाटावर पावसाच्या पाण्याचे तळे, लोकलमध्ये चढताना प्रवाशांची कसरत
पूर्व द्रुतगती महामार्गावरील कॅडबरी जंक्शन येथून वाहने जात होती. अचानक दोन टम्पो, ट्रक, डम्पर आणि मोटार अशी पाच वाहनांची एकमेकांना पाठोपाठ धडकली. या अपघातामुळे मोटारीचा चुराडा झाला आहे. तर इतर वाहनांचेही मोठ्याप्रमाणात नुकसान झाले आहे. या अपघातात मोटार चालक दीपक सिंह यांच्या डोक्याला, पायाला आणि चेहऱ्याला गंभीर दुखापत झाली आहे. तसेच एका टेम्पोमधील चालक भरत चव्हाण यांच्या डोक्याला, छातीला आणि पायाला देखील दुखापत झाली. या अपघातानंतर जखमींना स्थानिकांनी परिसरातील खासगी रुग्णालयात उपचारासाठी दाखल केले. अपघातामुळे पूर्व द्रुतगती महामार्गावर वाहनांच्या रांगा लागल्या होत्या. कॅडबरी जंक्शन ते तीन हात नाका पर्यंत वाहतुक कोंडी झाली होती. वाहतुक पोलीस आणि इतर बचाव पथकांनी तीन क्रेनच्या साहाय्याने येथील अपघातग्रस्त वाहने बाजूला केली. त्यानंतरही काहीकाळ वाहतुक कोंडी कायम होती. अपघातामुळे दुपारी नाशिक, घोडबंदरच्या दिशेने वाहतुक करणाऱ्या चालकांचे हाल झाले.
