ठाणे : केंद्रीय आयोगाने शिंदे गटाला अधिकृत शिवसेना असल्याचा निर्णय दिल्यानंतर एकनाथ शिंदे समर्थकांनी ठाण्यात फलकबाजी सुरू केली आहे. ‘बघितलं आनंदा… आपल्या एकनाथाने काँग्रेस, राष्ट्रवादीच्या पायी गहाण असलेला आपला धनुष्यबाण सोडविला’ असा त्यात मजकूर आहे.
केंद्रीय निवडणूक आयोगाने एकनाथ शिंदे यांच्या गटाला अधिकृत शिवसेना असल्याचा निर्णय दिला आहे. या निर्णयानंतर शिवसेना-उद्धव बाळासाहेब ठाकरे पक्ष आणि शिंदे समर्थकांच्या शिवसेनेमधील वादाने टोक गाठले आहे. बुधवारी ठाणे शहरात शिंदे समर्थकांनी फलकबाजी केली. या फलकावर ‘बघितलं आनंदा… आपल्या एकनाथाने काँग्रेस, राष्ट्रवादीच्या पायी गहाण असलेला आपला धनुष्यबाण सोडविला’ असा मजकूर आहे. या मजकुराशेजारीच शिवसेनाप्रमुख दिवंगत बाळासाहेब ठाकरे आणि शिवसेना नेते दिवंगत आनंद दिघे यांचे छायाचित्र आहे. तर एकनाथ शिंदे यांना आकाशातून दैवत धनुष्यबाण देत असल्याचे चित्र आहे. हे फलक शहरातील नागरिकांचे लक्ष वेधून घेत आहेत.
