महावितरण कर्मचाऱ्यांना मारहाण करणाऱ्या भिवंडीतील कुंदे गावातील चार जणांना अटक

महावितरणच्या वाडा उपविभागाचे उपकार्यकारी अभियंता अविनाश कटकवार यांच्या नेतृत्वाखाली कनिष्ठ अभियंता उद्देश बेलसरे, सुरक्षा पथक भिवंडी जवळील कुंदे गावात वीज ग्राहकांकडून थकित देयकाची वसुली आणि वीज चोरीचा शोध घेत होते. ही तपासणी मोहीम सुरू असताना कुंदे गावातील दिनेश होगे यांची वीज थकबाकी शिल्लक असल्याने त्यांच्या घराचा वीज मीटर यापूर्वीच महावितरण कर्मचाऱ्यांनी काढून नेला होता. तरीही त्यांच्या घरात वीजेचा चोरटा वीज पुरवठा सुरू असल्याचे पथकाच्या निदर्शनास आले. हा चोरीचा वीज पुरवठा खंडित करून कारवाई पथक अन्य ठिकाणी जात होते. त्यावेळी दिनेश होगे यांच्यासह नरेश, तुकाराम, शरद पाटील यांनी पथकाला शिवीगाळ सुरू केली. जनमित्र महेश राजपूत यांच्या हातामधील मोबाईल हिसकावून घेऊन त्यांना मारहाण करण्यात आली.

या घटनेसंदर्भात उपकार्यकारी अभियंता कटकवार यांनी तातडीने गणेशपुरी पोलीस ठाण्यात तक्रार केली. पोलिसांनी विद्युत नियम कायद्याने गुन्हा दाखल करून चार जणांना अटक केली. ही घटना घडुनही महावितरण पथकाने कुंदे गावातील १५ वीज चोरांविरुध्द कारवाई केली. वीज देयक थकबाकी भरणा करा अन्यथा वीज पुरवठा खंडितच्या कारवाईला सामोरे जा, असे पर्याय थकबाकीदारांसमोर ठेवण्यात आले आहेत, असे अधिकाऱ्याने सांगितले.