डोंबिवली – कल्याण, डोंबिवलीतील गैरधंदे बंद करण्यासाठी पोलिसांची जोरदार मोहीम सुरू आहे. शहराच्या विविध भागात पोलिसांची गस्ती पथके जुगार, मटके, दारू अड्डे, अंमली पदार्थ तस्करी अड्ड्यांवर कारवाई करत आहेत. अशा परिस्थितीत डोंबिवली पूर्वेतील रामनगर पोलीस ठाण्यापासून हाकेच्या अंतरावर, मानपाडा पोलीस ठाणे हद्दीतील टाटा पाॅवर नाका भागात दिवसाढवळ्या जुगार, मटके अड्डे चालविले जात आहेत.
या जुगार अड्डयांच्या माध्यमातून झटपट पैसा मिळत असल्याने अनेक नागरिक विशेषता कष्टकरी, मजूर वर्ग या अड्डयांवर सर्वाधिक येत असतो. अनेक वेळा या अड्ड्यांवर झटपट पैसा मिळण्या बरोबर हातामधील सर्व पैसा या खेळातून निघून जातो, असेही चित्र असते. अनेक कुटुंब प्रमुख या अड्ड्यांवर आपल्या पैशांची उधळण करतात. त्यामुळे अनेक कुटुंबाना त्याचे चटके बसत आहेत. अशी कुटुंबे हे अड्डे बंद करा म्हणून स्थानिक पातळीवर मागणी करत असतात, पण त्याची कोणीही दखल घेत नाही.
डोंबिवली पूर्वेत रामनगर पोलीस ठाण्यापासून हाकेच्या अंतरावर पूर्व रेल्वे स्थानकासमोरील एक इमारतीच्या दुसऱ्या माळ्यावर पडदे लावून दिवसाढवळ्या मटक्याचा अड्डा चालविला जात आहे. काही रिक्षा चालक, कष्टकरी, या अड्डयांमुळे व्यसनाधीन झालेले या अड्ड्यांवर सकाळीच येऊन मटका खेळत असतात. रेल्वे स्थानक भागातील वर्दळीच्या रस्त्यावर, रामनगर पोलीस ठाण्यापासून जवळ हा अड्डा सुरू असताना पोलिसांना या अड्ड्याची चाहूल कशी लागत नाही, असे प्रश्न नागरिक उपस्थित करत आहेत.
या भागातील दुकानदार, रिक्षा चालक, भाजी, फेरीवाले या सर्वांना हा अड्डा माहिती आहे. यामधील अनेक विक्रेते या अड्ड्यावर झटपट पैसा मिळेल या आशेने मटका अड्डयावर जात असल्याची माहिती आहे.काही रिक्षा चालकही प्रवासी वाहतुकीतून मिळणारे भाडे कुटुंबीयांचा विचार न करता या मटका अड्ड्यावर उडवत असल्याची माहिती आहे. असे अड्डे शहरात दिसता कामा नयेत असे पोलीस उपायुक्त अतुल झेंडे यांचे आदेश आहेत. स्थानिक पोलीस या अड्डयावर कारवाई करत नसल्याने उपायुक्तांनी हा अड्डा उध्वस्त करण्यासाठी पुढाकार करण्याची मागणी नागरिक, व्यापारी करत आहेत.
अशाच पध्दतीने मानपाडा पोलीस ठाणे हद्दीतील टाटा नाका भागात वर्दळीच्या भागात एक मटक्याचा अड्डा चालविता जात आहे. दुकान, एमआयडीसीत मजूर म्हणून काम करणारे, काही पादचारी या अड्ड्यावर येऊन मटका खेळत असल्याचे दिसते. रस्त्यावर हातगाडी, शेगडी लावून वडापाव, पाणीपुरी, रस्ता वाहतुकीला अडथळा ठरणाऱ्यांवर पोलीस झटपट कारवाई करत आहेत. दिवसाढवळ्या सुरू असलेल्या या जुगार, मटका अड्डयांवर पोलीस का कारवाई करत नाहीत, असे प्रश्न नागरिक उपस्थित करत आहेत.
टाटा नाका भागातील मटका अड्डा एक महिला चालवित असल्याच्या तक्रारी आहेत.दोन्ही पोलीस ठाण्यातील अधिकाऱ्यांनी मात्र आमच्या पोलीस ठाण्यात कोठेही गैरधंदे चालणार नाहीत याची काळजी घेतली जाते. प्राप्त तक्रारीप्रमाणे करावाई केली जाते. असे अड्डे सुरू असतील तर त्यांच्यावरही कारवाई केली जाईल असे सांगितले.