ठाणे महापालिकेत सात सहाय्यक आयुक्तांची शासनाकडून नेमणूक, कार्यालयीन अधिक्षकांकडील अतिरिक्त पदभार होणार कमी

ठाणे महापालिकेत सहाय्यक आयुक्त पदाची एकूण १८ पदे आहेत. पालिकेच्या विविध विभागांसह प्रभाग समित्यांची जबाबदारी सहाय्यक आयुक्तांच्या खांद्यावर असते. गेल्या काही वर्षांपासून पालिकेच्या प्रभाग समित्यांवर पालिका तसेच शासन नियुक्त सहाय्यक आयुक्त कार्यरत आहेत. मात्र, एक ते दिड वर्षांमध्ये पालिकेचे काही सहाय्यक आयुक्त सेवा निवृत्त झाले तर, शासन नियुक्त सहाय्यक आयुक्तांची इतरत्र बदली झाली. त्यांच्या जागी शासनाने नवीन सहाय्यक आयुक्तांची नेमणुक केली नव्हती. यामुळे पालिका प्रशासनाने विविध विभागांसह प्रभाग समित्यांमध्ये कार्यालयीन अधिक्षक तसेच उपअधिक्षक असलेल्या अधिकाऱ्यांकडे सहाय्यक आयुक्त पदाचा अतिरिक्त पदभार दिला होता.

यामध्ये कार्यालयीन अधिक्षक सोपान भाईक, सुनीता सातपुते, तनुजा रणदिवे आणि कार्यालयीन उपअधिक्षक स्मिता सुर्वे यांचा समावेश होता. त्यांच्या नियुक्तीवरून पालिका प्रशासनावर टिकाही होत होती. या टिकेनंतर रिक्त असलेल्या पदांवर सहाय्यक आयुक्त उपलब्ध व्हावेत, यासाठी महापालिकेने राज्य शासनाकडे पत्रव्यवहार केला होता. ही मागणी मान्य करत राज्य शासनाने ठाणे महापालिकेला एकाच वेळेस सात सहाय्यक आयुक्त उपलब्ध करून दिले आहेत. त्यांच्या नियुक्तीचे आदेश राज्य शासनाने मंगळवारी काढले आहेत यात गौरव वांदेकर, शिवप्रसाद नागरगोजे, स्वप्नील चव्हाण, अर्जुन सुरवसे, विजय कावळे, सोमनाथ बनसोडे आणि सोनल काळे यांचा समावेश आहे.

ठाणे महापालिकेत नियुक्त करण्यात आलेल्या सात सहाय्यक आयुक्तांकडे कोणत्या विभागांची तसेच प्रभाग समितींची जबाबदारी दिली जाईल, हे येत्या काही दिवसांत स्पष्ट होणार आहे. मात्र, त्यांच्या नियुक्तीमुळे सहाय्यक आयुक्त पदाची अतिरिक्त जबाबदारी सांभाळणाऱ्या कार्यालयीन अधिक्षक तसेच उपअधिक्षक यांच्याकडील अतिरिक्त पदभार कमी होण्याची चिन्हे आहेत. ठाणे महापालिकेत सहाय्यक आयुक्तांची एकूण १८ पदे मंजुर आहेत. त्यातील १० पदे आता भरली गेली असून त्यात तीन पदांवर पालिका अधिकाऱ्यांचा समावेश आहे. अजूनही आठ पदे रिक्त असल्याची माहिती ठाणे महापालिका प्रशासनाने दिली.