उल्हासनगरच्या प्रत्येक चौकाला एक वेगळी खाद्यसंस्कृती आहे. विविध पदार्थाची रेलचेल इथल्या चौकात पाहायला मिळते. तसाच एक चौक म्हणजे उल्हासनगर महापालिका मार्गावरील काशाराम चौक. इथे गेल्या पंधरा वर्षांपासून गुरू पुरीभाजी हे नाश्त्याचे ठिकाण आहे. पूर्वी कापड शिवणीचे काम करणाऱ्या किशोर शर्मा यांनी या दुकानाची सुरुवात केली. सध्या त्यांची तीन मुले हा व्यवसाय सांभाळतात. नाश्त्याच्या पदार्थासह इथे दुपारच्या जेवणाचीही चांगली पंगत बसते. शाकाहारीसह आठवडय़ातून तीन दिवस येथे मांसाहारही उपलब्ध असतो. शाकाहारीमध्ये राजमा, सोयाबीन, मकरी, मुंग मसाला, डालफ्राय, चनामसाला, छोले या सिंधी पद्धतीने बनविलेल्या भाज्या इथे मिळतात. मध्यम तिखट असूनही परिसरातील अनेक खवय्ये दुपारच्या जेवणासाठी गुरू पुरीभाजीला पसंती देतात. कोळशाच्या शेगडीवर गरम केलेल्या भाज्या इथे ताटात वाढल्या जातात. चपात्यांसोबतच तांदळाची भाकरी आणि त्यासह सिंधी नागरिकांमध्ये प्रसिद्ध असलेली गव्हाच्या पिठापासून मिरची कोंथिंबिरीच्या साहाय्याने तयार केलेली कोकीसुद्धा इथे उपलब्ध असते. बुधवार, शुक्रवार आणि रविवार येथे शाकाहारासोबत मांसाहारही असतो. मटण खिमा, चिकन खिमा, चिकन वडापाव असे चिकनपासून तयार केलेले अनेक पदार्थ येथे खवय्यांसाठी उपलब्ध असतात. मांसाहाराच्या दिवशी तर दुपारी इथे अक्षरश: जेवणासाठी रांग पाहायला मिळते. अनेकजण चिकन मसालासोबत तांदळाची भाकरी खाणे पसंत करतात तर कोकीसोबत चिकनची चव चाखणारेही तितकेच आहेत. खिमा राइसला इथे चांगली मागणी असते. झणझणीत खिमा आणि भाताची येथील चवच वेगळी असते. त्यामुळे अर्धा ते एक तास आपला नंबर येण्यासाठी लागत असला तरी खवय्ये चवीसाठी ताटकळत उभे राहणे पसंत करतात. अवघ्या ५० रुपयांपासून १५० रुपयांपर्यंत इथे भरपेट जेवण करता येते. त्यामुळे उल्हासनगरातील दूरवरून अनेकजण येथे दुपारच्या जेवणासाठी इथे येत असतात. मात्र जागेअभावी अनेकदा खवय्ये येथून पार्सल घेऊन जाणे पसंत करतात.
अवघ्या सहा फूट रुंदीच्या या छोटेखानी खानावळीत अनेक बडय़ा हस्ती, नगरसेवक, आमदार, अधिकारी आणि खवय्ये गर्दी करत असतात. उल्हासनगरात मोठय़ा हॉटेल्सचीही कमी नाही. गल्लोगल्ली प्रशस्त हॉटेल्स आहेत. मात्र तरीही गुरू पुरीभाजीवाल्याच्या दुकानाला आजही चांगली पसंती मिळते. उल्हासनगर तीनच्या परिसरात महाविद्यलयेही आहेत. तरुणांना चकचकीत हॉटेल्स आवडतात असा समज आहे. मात्र अनेक तरुण आणि महाविद्यालयीन विद्यार्थीही पोटपूजेसाठी इथे येत असतात. आमच्या चवीमुळे ते आम्हाला पसंती देतात, असे सागर सांगतो. दुकानात प्रवेश करताच किशोर शर्मा यांचा मुलगा सागर घरी पाहुणे आल्यासारखे तुम्हाला आत आमंत्रित करत असतो. त्यासोबतच तुमच्यासाठी जागा करत तुम्हाला जेवण मिळेपर्यंत पापड आणि चटणीची चव चाखायला देतात. त्यानंतर मुख्य ऑर्डर दिल्यानंतरही घरी आलेल्या पाहुण्याचा पाहुणचार करावा तशा प्रकारे शर्मा बंधू जेवू घालत असतात. त्यामुळे इथे येणाऱ्या खवय्यांना आपलेपणाचा अनुभव येत असतो. साहजिकच खवय्ये इथे पुन्हा पुन्हा येतात. आपल्या आदरातिथ्यासोबतच ग्राहकांची नावे विचारून ती लक्षात ठेवण्याची आणि नंतर त्याच नावाने हाक मारण्याची कला शर्मा बंधूंच्या अंगी आहे. त्यामुळे येथे येणाऱ्या ग्राहकांशी शर्मा बंधूंचे एक वेगळेच नाते तयार झाले आहे.
पापड आणि चटणी मोफत
या ठिकाणी प्रवेश केल्यानंतर सुरुवातीलाच तुम्हाला उडदाचा तळलेला पापड आणि जाड हिरव्या मिरच्यांची जाडी भरडी चटणी विनामूल्य दिली जाते.
गुरू पुरीभाजीवाला
- कुठे :- सतरा सेक्शन, महापालिका मार्ग, काशाराम चौक, उल्हासनगर.
- कधी :- सकाळी ११ ते सायंकाळी ५.
