कल्याण : विठ्ठलवाडीत मजुराला दारूसाठी जीवे ठार मारण्याचा तरूणांचा प्रयत्न

ओम उर्फ तुषार भोसले, ऋतिक उर्फ चुहा साबळे, प्रेम सिंग उर्फ गुंडा, विशाल यादव उर्फ दही आणि पुई अशी आरोपींची नावे आहेत. हे सर्व आरोपी २३ ते २५ वयोगटातील आहेत. पोलिसांनी सांगितले, तक्रारदार मजूर संदीप विश्वकर्मा हे दिवसभराची मजुरी करून पायी आपल्या खडेगोळवली येथील घरी चालले होते. मुलांसाठी खाऊ घेतला होता. विठ्ठलवाडी बस आगाराजवळ आल्यावर संदीपला आरोपी पाच तरूणांनी अडविले. आम्हाला दारू पिण्यासाठी पैस दे, नाहीतर तुला येथून सोडणार नाही, अशी धमकी आरोपींनी दिली.

हेही वाचा : ठाण्यातील खासगी डाॅक्टर देणार पालिका रुग्णालयात सेवा

मी दिवसभर कष्टाचे काम करून घरी चाललो आहे. तुम्हाला देण्यासाठी माझ्या जवळ पैसे नाहीत, असे संदीपने तरूणांना सांगितले. या वाक्याचा राग येऊन आरोपी तरूणांनी संदीपला मारहाण सुरू केली. त्याला खाली पाडून मारण्यात आले. त्याच्यावर धारदार शस्त्राने वार करून त्याला जखमी केले. यावेळी संदीप एकटाच असल्याने त्याला वाचविण्यासाठी कोणी पुढे आले नाही. संदीपच्या खिशातील दिवसभराच्या मजुरीतून मिळालेले एक हजार रूपये आणि त्याचा मोबाईल आरोपींनी काढून घेतला. ते पळून गेले. जखमी अवस्थेत संदीपने विठ्ठलवाडी पोलीस ठाण्यात जाऊन तक्रार केली. पोलीस आरोपींचा शोध घेत आहेत. कल्याण, डोंबिवलीत गुन्हेगारी वाढत असल्याने नागरिकांमध्ये भीतीचे वातावरण आहे.