ठाणे : मोघरपाडा येथील १७४ हेक्टर जमीन एमएमआरडीए हस्तांतरणाला मान्यता, मेट्रो कारशेडची होणार उभारणी

मौजे मोघरपाडा येथील सर्व्हे क्रमांक ३० येथील मेट्रो कार शेड उभारण्यात येणार आहे. मात्र या ठिकाणी गेल्या अनेक वर्षांपासून शेती करण्यात येत आहे. यातील १६७ भाडेपट्टेधारक शेतकरी व ३१ अतिक्रमणधारक शेतकरी यांना विशेष नुकसान भरपाई योजना म्हणून शासनाने धोरण तयार केले आहे. तर कारशेड उभारणीसाठी लागणारी १७४.०१ हेक्टर जमीन मुंबई महानगर प्रदेश विकास प्राधिकरणाला हस्तांतरीत करण्यास मान्यता देण्यात आली आहे. जमिनीवरील पट्टेधारक शेतकरी तसेच अतिक्रमण धारकांची पात्रता जिल्हाधिकाऱ्यांनी निश्चित केली आहे. या अंतर्गत ज्या शेतकऱ्यांच्या नावावर जमीन आहे तसेच ज्या शेतकऱ्यांच्या नावावर जमीन नाही परंतु कब्जा आहे यांचा समावेश आहे. ज्या शेतकऱ्यांच्या नावावर सातबारा आहे, त्यांना २२.५ टक्के मोबदला शासनाच्या नियमानुसार देण्यात येईल. ज्या शेतकऱ्यांचे नाव नाही परंतु अतिक्रमण कब्जा आहे व ती जमीन शासनाची आहे, त्या ठिकाणी १२.५ टक्के शासनाच्या नियमानुसार मोबदला देण्यात येईल. त्यामुळे शेतकऱ्यांच्या हितासाठी त्यांना योग्य तो मोबदला निश्चित देण्यात येणार आहे. अशा प्रकारे शेतकऱ्यांना मोबदला मिळण्याचे हे राज्यातील पहिलेच उदाहरण असल्याचे मंत्री प्रताप सरनाईक यांनी सांगितले. तसेच या अंतर्गत शेतकऱ्यांना वस्तूनिहाय प्लॉट, तेथील रस्ते, गटारे, भूखंड, इलेक्ट्रॉनिक पोल, शेतकऱ्यांस कसा फायदा होईल व पुनर्वसन कसे होईल, याविषयी देखील त्यांनी सांगितले.