उपमुख्यमंत्री एकनाथ शिंदे म्हणतात, “सर्व पक्षांनी एकच रस्ता धरलाय, तो म्हणजे धनुष्यबाणाची शिवसेना”

ठाणे येथील आनंद आश्रमात गुरूवारी सायंकाळी उपमुख्यमंत्री एकनाथ शिंदे यांच्या उपस्थितीत पालघर, अकोला, सोलापूर, संभाजीनगर, अहिल्यानगर, नागपूर, कन्नड, मुंबईतील चेंबुर आणि ठाणे जिल्ह्यातील भिवंडी, वाडा, शहापूर या भागातील उबाठा, काँग्रेस, राष्ट्रवादी आणि आप पक्षातील पदाधिकारी कार्यकर्त्यांनी शिवसेनेत पक्ष प्रवेश केला. यानंतर शिंदे यांनी उपस्थित कार्यकर्त्यांना मार्गदर्शन करताना विरोधकांवर टिका केली. काहीजण म्हणत होते की, सुप्रीम कोर्ट झाले आता जनतेच्या न्यायालयात जाऊ. पण, विधानसभा निवडणुकीत आपले ६० आमदार निवडुण आल्याने खरी शिवसेना कुणाची हे जनतेने ठरवले. काही जणांना स्वप्न पडले होते. त्यांनी मंत्रीमंडळही तयार केले होते. हाॅटेलही बुक केले होते. पण, जनतेने आणि लाडक्या बहिणींनी त्यांचे बुकींग रद्द केले, असा टोला शिंदे यांनी लगावला.

हेही वाचा : ठाणे : थकीत कर वसुलीसाठी पालिकेने वाजविले ढोल ताशे, नौपाडा विभागात पालिका प्रशासनाकडून कारवाई

अडीच वर्षांपुर्वी बाळासाहेबांच्या विचाराचे सरकार स्थापन केले. विकासाबरोबरच कल्याणकारी योजना राबविल्या. यामु‌‌ळे महायुतीचा बहुमताने विजय झाला. लाडकी बहिण, भाऊ, शेतकरी, युवक, जेष्ठ अशा सर्वांनी भरभरून मतांचा वर्षाव केला आणि मी सांगत होतो, त्याप्रमाणे विरोधक चारही मुंड्या चीत झाले, असेही ते म्हणाले. मी विधानसभेत म्हणालो होतो, देवेंद्र फडणवीस आणि मी असे आम्ही दोघे दोनशे आमदार निवडुन आणू नाहीतर गावाला शेती करायला जाऊ. पण आम्ही दोघांनी २३२ आमदार निवडुण आणले. निवडणुकीमध्ये लाडक्या बहिणीने सावत्र भावांची जागा दाखवली आणि घरी बसणाऱ्यांना घरी बसून टाकले. फेसबुक लाईव्ह करणाऱ्या फेसबुक लाईव्ह करायला पाठवून दिले, अशी टिकाही त्यांनी केली. राज्यातील २ कोटी ३९ लाख लाडक्या बहिणींचा लाडका भाऊ ओळख मिळाली असून ती कुठल्याही पदापेक्षा मोठी आहे. सीएम म्हणजे काॅमन मॅन असे मी म्हणायचो. आता उपमुख्यमंत्री असताना डिसीएम म्हणजेच डेडीकेटेड टू काॅमन मॅन असे म्हणतो, असेही ते म्हणाले.