उल्हासनगरात पुन्हा एक बांगलादेशीला अटक; आशेळे गावात पुन्हा कारवाई, आतापर्यंत २० जण ताब्यात

उल्हासनगर गुन्हे शाखेने गुरुवारी आशेळे गावातील कृष्णा नगरमध्ये एका घरात धाड टाकून अनधिकृतपणे आणि कोणत्याही वैध व्हिसाविना राहणाऱ्या शहाजान दुलाल मुल्ला या ३५ वर्षीय व्यक्तीला अटक केली. विठ्ठलवाडी पोलीस ठाण्यात याबाबत गुन्हा दाखल करण्यात आला आहे. तसेच त्याला राहण्यासाठी आश्रय देणाऱ्या घर मालकावरसुद्धा कारवाई केली जाणार आहे. मागील दोन वर्षांपासून हा व्यक्ती विनापरवाना आशेळे गाव याठिकाणी राहत असल्याची माहिती पोलिसांनी दिली आहे. या कारवाई नंतर अशा प्रकारे बेकायदेशीररित्त्या वास्तव्य करणाऱ्या बांगलादेशी घुसखोरांची माहिती देण्याचे आवाहन पोलिसांनी केले आहे. येत्या काळात अशा बेकायदेशीरपणे बांगलादेशी घुसखोर व्यक्तींना आश्रय देणाऱ्या घर मालकांवरही कठोर कारवाई होणार आहे.