आता ग्रामीण भागांत ‘जीन्स’ची धुलाई

सर्वोच्च न्यायालय आणि राष्ट्रीय हरित लवाद यांच्या दणक्याने उल्हासनगर शहरात जीन्स धुलाई उद्योग बंद पडला असला तरी कारखानदारांनी आपला मोर्चा आता ग्रामीण भागाकडे वळवला आहे. त्यात मलंगगड पट्टय़ातील काही गावे, अंबरनाथ तालुक्यातील ग्रामीण भागात सध्या जीन्स धुलाईचे उद्योग राजरोसपणे सुरू असून त्यामुळे स्थानिकांना दुर्गंधी आणि प्रदूषणाला सामोरे जावे लागते आहे.

वालधुनी नदीप्रदूषणामुळे वादात सापडलेल्या जीन्स धुलाई कारखान्यांवर बंदीची कारवाई करण्यात आली. त्यानंतरही काही मुजोर जीन्स धुलाई कारखानदारांनी चोरीची वीज वापरत कारखाने सुरूच ठेवले. त्यामुळे उल्हासनगर महापालिकेची कोंडी झाली. याच मुद्दय़ावरून वनशक्ती संस्थेने पुन्हा सर्वोच्च न्यायालयात सद्य:स्थिती मांडल्यानंतर महापालिकेला तीन आठवडय़ांत प्रतिज्ञापत्र देण्याचे आदेश दिले आहेत.

या गदारोळात कारखाने सुरू ठेवण्यासाठी जीन्स कारखानदारांनी आता नामी शक्कल लावली आहे. त्यांनी आपले कारखाने अंबरनाथ तालुक्यातील ग्रामीण भागात वळवले आहेत. बरेचसे मलंगगड पट्टय़ात स्थलांतरित झाले आहेत. येथील ढोके, खरड, आंभे, शेलारपाडा, पोसरी, गारपे या गावांच्या सीमेवर आता जीन्स धुलाईचे उद्योग सुरू झाले आहेत. त्यामुळे त्याचे प्रदूषित सांडपाणी खुल्या शेतात किंवा जसे सोडता येणे शक्य आहे तसे सोडण्यात येते आहे. त्यामुळे भूजल पातळीसह जमिनीचा पोतही बिघडत असून नागरिक जीन्स कारखान्यांच्या या उद्योगामुळे संताप व्यक्त करत आहेत. स्थानिक ग्रामपंचायतीची कोणतीही परवानगी न घेता हे कारखाने सुरू केल्याने स्थानिक यंत्रणांनाही अंधारात ठेवल्याचे समोर आले आहेत. तसेच कोणतीही सांडपाणी प्रक्रियेची यंत्रणा  राबवण्यात येत नसल्याने प्रदूषणाची भीती नागरिक व्यक्त करीत आहेत.

रात्री धुलाई

अंबरनाथ शहरातील औद्योगिक वसाहती आणि बदलापूरच्या ग्रामीण भागातील वेशीवरच्या अनेक शेतघर आणि फार्म हाऊसमध्ये बिनदिक्कत जीन्स धुलाईचे उद्योग सुरू झाल्याची माहिती विश्वसनीय सूत्रांकडून मिळाली आहे. रात्री उशिरा शिवलेल्या जीन्स पॅंट धुलाईसाठी बाहेर पडतात. त्या अंबरनाथ आणि बदलापुरात जात असतात. मात्र याकडे पोलीस, प्रदूषण नियंत्रण मंडळ आणि स्थानिक प्रशासनाचे दुर्लक्ष होत आहे. त्यामुळे येत्या काळात बदलापूर, अंबरनाथचा पट्टाही प्रदूषित होण्याची भीती व्यक्त होत आहे.