कल्याण पूर्व शिवसेना शहरप्रमुखपदी नीलेश शिंदे यांची नियुक्ती

कल्याण पूर्व शिंदे शिवसेनेचे शहरप्रमुख महेश गायकवाड यांनी बंडखोरी करून महायुतीच्या कल्याण पूर्व विधानसभा मतदारसंघातील उमेदवार सुलभा गायकवाड यांच्या विरुध्द उमेदवारी दाखल केला. त्यांना समज देऊनही उमेदवारी अर्ज मागे न घेतल्याने जिल्हाप्रमुख गोपाळ लांडगे यांनी नुकतीच शिंदे शिवसेनेच्या शहरप्रमुख पदावरून महेश गायकवाड यांची हकालपट्टी केली होती.

हेही वाचा >>>राजकिय वातावरण गढूळ करणाऱ्या शिंदे पिता-पुत्राचे राजकारण संपविण्याची वेळ आली आहे; मनसे आमदार राजू पाटील यांची संतप्त प्रतिक्रिया

विधानसभा निवडणूक सुरू असल्याने स्थानिक पातळीवर पक्ष नेतृत्व करण्यासाठी शहरप्रमुखाची गरज असल्याने जिल्हाप्रमुख लांडगे यांनी नीलेश शिंदे यांना शहरप्रमुख पदी, प्रशांत काळे यांना विधानसभा प्रमुखपदी नियुक्तीची पत्रे दिली. शहरप्रमुख नीलेश शिंदे शिवसेनेचे माजी नगरसेवक आहेत. अभ्यासू नगरसेवक म्हणून त्यांची ओळख आहे. प्रशांत काळे राजकीय, सामाजिक क्षेत्रात कार्यरत आहेत. कल्याण पूर्व विधानसभा मतदारसंघातून ते शिवसेनेतून निवडणूक लढविण्यासाठी इच्छुक होते. पण ही जागा महायुतीमध्ये भाजपच्या वाटयाला गेल्याने त्यांनी शांत राहणे पसंत केले.

‘माजी नगरसेवक असताना शिवसेनेच्या माध्यमातून प्रभागात आपण अनेक विकास कामे केली. या माध्यमातून आपला लोकांशी थेट संपर्क आहे. नवीन जबाबदारी आपल्यावर मुख्यमंत्री एकनाथ शिंदे, खा. डाॅ. श्रीकांत शिंदे यांनी दिल्याने पक्ष संघटना वाढविणे आणि ती अधिक मजूबत करण्यासाठी आपण प्रयत्न करणार आहोत,’ असे शहरप्रमुख नीलेश शिंदे यांनी सांगितले.