कोंडीमुक्तीसाठी बहुद्देशीय संकुलाची उभारणी!

डोंबिवलीतील बाजीप्रभू चौकात अद्ययावत आगार, रिक्षा वाहनतळ व शॉपिंग मॉल
रिक्षा, खासगी वाहने आणि पादचाऱ्यांच्या वर्दळीमुळे नेहमीच कोंडीने गजबजलेल्या डोंबिवली रेल्वे स्थानक परिसरातील पूर्व आणि पश्चिम परिसराला मोकळा श्वास घेता यावा यासाठी महापालिकेने या भागात बहुद्देशीय संकुलाच्या उभारणीचा प्रस्ताव तयार केला आहे. दिवस-रात्र होणाऱ्या कोंडीमुळे या भागातून वाहने चालविणे अवघड झाले आहे. अनेक वर्षांपासूनची ही कोंडी फोडण्यासाठी महापालिकेने डोंबिवली पूर्वेत इंदिरा चौक ते बाजीप्रभू चौक दरम्यान बहुद्देशीय संकुल उभारण्याचा निर्णय घेतला आहे. या संकुलात आगार, वाहनतळ तसेच महापालिकेची कार्यालये सुरू करण्याचा प्रस्ताव तयार करण्यात आला आहे. याशिवाय डोंबिवली पश्चिम रेल्वे स्थानकाला खेटून असलेल्या मासळी बाजाराची पुनर्बाधणी करून या ठिकाणी संकुल उभारले जाणार आहे.
डोंबिवली पूर्व, पश्चिम भाग कोंडीमुक्त करण्यासाठी महापालिकेने या संपूर्ण परिसराचा विकास आराखडा तयार केला आहे, अशी माहिती महापालिकेचे अतिरिक्त आयुक्त संजय घरत यांनी ‘ठाणे लोकसत्ता’ला दिली. या आराखडय़ानुसार डोंबिवली पूर्व भागात इंदिरा चौकात असलेली महापालिकेची दुमजली इमारत जमीनदोस्त करण्यात येणार आहे. महापालिकेला लागून असलेल्या सहकार भांडार व खासगी जमीनमालकांच्या संमतीने महापालिका कार्यालय ते बाजीप्रभू चौक दरम्यान आठ माळ्यांचे प्रशस्त बहुद्देशीय संकुल उभारण्यात येणार आहे. खासगी ठेकेदारांच्या सहभागातून हे संकुल उभारण्यात येणार आहे. या संकुलाच्या भुयारी भागात प्रशस्त वाहनतळ, त्यावर केडीएमटीचे आगार, तळमजल्याला व्यापारी गाळे, पहिल्या माळ्यावर सहकार भांडार, हॉटेल व्यावसायिकासाठी जागा, शॉपिंग मॉल, तिसऱ्या व चौथ्या माळ्याला वाहनतळाची सुविधा ठेवण्यात येणार आहे. त्यानंतरच्या माळ्यांवरील जागा पालिकेची प्रभाग कार्यालये, सभागृह यासाठी राखीव ठेवण्यात येणार आहे. महापालिकेला कायमस्वरूपी महसुलाचा स्रोत सुरू राहील हा या बहुद्देशीय प्रकल्पामागील उद्देश आहे, असे घरत यांनी सांगितले.
या प्रकल्पासाठी पालिकेने गेल्यावर्षी सुमारे सव्वा कोटीची तरतूद केली आहे. विष्णुनगर पोलीस ठाणे हे या भागातील वाहतूक कोंडीचे मुख्य कारण होऊन बसले आहे. त्यामुळे विष्णुनगर पोलीस ठाण्याचे मोठागाव परिसरातील महापालिकेच्या जागेत स्थलांतर करण्याचा प्रस्ताव तयार करण्यात आला आहे.