भाडे सुसूत्रीकरणातून बसच्या तिकीट दरांत १ ते ३ रुपयांची कपात
नेहमीच तोटय़ाचे तुणतुणे वाजविणाऱ्या कल्याण-डोंबिवली महापालिका परिवहन उपक्रमाने प्रवासी भाडय़ात सुसूत्रीकरणाचा प्रयत्न सुरू केला असून अधिकाधिक प्रवासी परिवहन सेवेकडे आकृष्ट व्हावेत, यासाठी प्रवासी भाडय़ात १ ते ३ रुपयांची कपात करण्याचा निर्णय घेतला आहे. किलोमीटर टप्प्याऐवजी प्रवाशांना आता ठरावीक थांब्यांसाठी ठरावीक भाडय़ाचे तिकीट मिळणार आहे. रेल्वेचा प्रवास करताना प्रवाशाने ठाण्याचे तिकीट काढले तर तो प्रवासी त्याच तिकिटावर भांडुपपर्यंत प्रवास करू शकतो. त्याचप्रमाणे केडीएमटीत बसलेला प्रवासी उतरणाऱ्या थांब्यानंतर पुढचे दोन थांबे त्याच तिकिटावर प्रवास करू शकणार आहे, अशी माहिती परिवहन विभागातील अधिकाऱ्याने दिली. लवकरच या निर्णयाची अंमलबजावणी केली जाणार आहे, अशी माहिती सूत्रांनी दिली.
कल्याण-डोंबिवली परिवहन उपक्रमाने तिकिटांच्या दरात फार कपात केलेली नाही. मात्र, सुसूत्रीकरणामुळे काही मार्गावर प्रवाशांना दिलासा मिळणार आहे, असा दावा सूत्रांनी केला. बेस्ट उपक्रमाने मध्यंतरी घटलेली प्रवासी संख्या वाढविण्यासाठी तिकीट भाडय़ात सुसूत्रीकरणाचा निर्णय घेतला होता. याच धर्तीवर कल्याण-डोंबिवली परिवहन उपक्रमाने यासंबंधीचे सुधारित प्रस्ताव तयार केले आहेत. केडीएमटीने शासनाकडे प्रवासी भाढे कमी
करण्यासाठी प्रस्ताव पाठविला होता. हा प्रस्ताव तीन महिन्यापूर्वीच मंजूर होऊन आला आहे. या प्रस्तावाला एमएमआरडीए, परिवहन आयुक्त, नगरविकास विभागाने मान्यता दिली आहे. कल्याण-डोंबिवली शहर परिसरात २ किलोमीटर ते ५० किलोमीटर पट्टय़ात धावणाऱ्या ‘केडीएमटी’ बसगाडय़ांचे थांबे तसेच किलोमीटरप्रमाणे त्या प्रवासाचे भाडे याचे नियोजन करण्यात वेळ गेला. त्यामुळे भाडे कपातीची अंमलबजावणी करण्यास वेळ लागला, असे सूत्राने सांगितले.
हजारपेक्षा जास्त प्रीमियम लेखांचा आस्वाद घ्या ई-पेपर अर्काइव्हचा पूर्ण अॅक्सेस कार्यक्रमांमध्ये निवडक सदस्यांना सहभागी होण्याची संधी ई-पेपर डाउनलोड करण्याची सुविधा
