‘निधी’ अभावी रखडले कुशीवली धरण

कुठे आहे धरण
कल्याणपासून आठ किलोमीटर अंतरावरील मलंग गडाच्या डोंगर रांगेत पाच पीर डोंगर, मलंग गडाचा माथा यांच्या कुशीत हे धरण क्षेत्र आहे. प्रस्तावित धरणाच्या पायथ्याला नदीसारखी मोठी घळ (लहान नदी) आहे. पावसाळ्यात ही घळ दुथडी भरुन वाहते. डिसेंबपर्यंत या घळीत पाणी असते. कुशीवली गावच्या वेशीवरुन ते आंबे गावच्या हद्दीपर्यंत या धरणाची बांधकाम रेषा आहे. उलटा ‘एल’ आकाराच्या बांधाची रचना या धरणासाठी प्रस्तावित आहे.

सहा वर्षांपूर्वी निविदा प्रक्रिया
कोकण पाटबंधारे विकास महामंडळाने २०११ मध्ये कुशीवली लघु पाटबंधारे प्रकल्प आकाराला आणण्यासाठी निविदा प्रक्रिया पूर्ण केली होती. २९ कोटी ३५ लाख रुपयांचा निधी या धरणाच्या उभारणीसाठी प्रस्तावित होता. कुशीवली धरण मातीचे आहे. या धरणाला सांडवा, बाह्य़ कालवा प्रस्तावित आहे. निविदा प्रक्रियेनंतर सुरुवातीचे सहा महिने कुशीवली धरण क्षेत्रात मोठय़ा प्रमाणात यंत्र सामुगी आणून माती, दगडांचे नमुने घेण्याची कामे सुरु करण्यात आली होती. धरणाच्या हद्दीसाठी चर खोदण्याचे काम सुरु केले होते. तीन वर्षांत हे धरण बांधून पूर्ण करण्यात येणार होते. कुशवली परिसरातील ग्रामस्थांना रोजगार उपलब्ध झाला होता. पण सहा महिने काम करुनही मजुरांना लघु पाटबंधारे विभागाकडून कामाची मजुरी देण्यात आली नाही. कामाचा, जमिनीचा मोबदला देण्यात येत नसल्याने संतप्त झालेल्या ग्रामस्थ व मजुरांनी धरणाची कामे मग बंद पाडली, असे कुशीवलीचे ग्रामस्थ रमेश पाटील यांनी सांगितले. कुशीवली धरणामुळे गावचा विकास होणार असल्याने शेतकरी जमिनी देण्यास तयार आहेत. सरकारी अधिकाऱ्यांनी शेतकऱ्यांशी संवाद साधून जमिनीचा मोबदला, बुडविलेली मजुरीचा प्रश्न सोडविला पाहिजे, असे जुनेजाणते महादू गायकर यांनी सांगितले.

कुशीवली धरण प्रकल्प पूर्ण होण्यात निधीची उपलब्धता ही एक मोठी अडचण आहे. या धरणासाठी वन विभागाची काही जमीन लागणार आहे. ती जमीन मिळविण्यासाठी वन विभागाकडे पैशांचा भरणा करण्यात आला आहे.धरणासाठी निधी उपलब्ध करुन दिला तर मोठा भाग सिंचना खाली येईल. तसेच, कल्याण-डोंबिवली पालिकेने या धरणाच्या उभारणीसाठी पुढाकार घेतला तर पालिकेला अखंड पाण्याचा स्त्रोत व स्वत:चे धरण उपलब्ध होईल.
– किसन कथोरे, आमदार, अंबरनाथ