‘लोकसत्ता आरोग्यभान’ वार्षिकांकाचे आज ठाण्यात प्रकाशन

ठाणे : आरोग्यविषयक जागरूकता वाढविणाऱ्या ‘लोकसत्ता आरोग्यभान’ या वार्षिकांकाचे प्रकाशन आज गुरुवारी ठाण्यात सायंकाळी सहा वाजता होणार आहे. यावेळी ‘मानसिक संतुलनातून शारीरिक आरोग्याकडे’ या खास चर्चासत्राचे आयोजन करण्यात आले आहे. मानसिक ताणतणाव तसेच बदलती जीवनशैली यावर या चर्चासत्रात तज्ज्ञ वक्ते उपस्थितांशी संवाद साधणार आहेत.

घडय़ाळ्याच्या काटय़ाप्रमाणे वेगवान झालेल्या आयुष्यात कळत-नकळत आरोग्यावर होणारे दुष्परिणाम टाळून निरामय आयुष्य कसे जगावे तसेच मानसिक संतुलन सांभाळून निरोगी कसे राहावे याबाबतचे मौलिक मार्गदर्शन ऐकण्याची संधी ठाणेकरांना या चर्चासत्राद्वारे लाभणार आहे. ठाणे पश्चिम येथील ‘हॉटेल टिपटॉप प्लाझा’ येथे हा कार्यक्रम होणार आहे.

वाढत्या तंत्रज्ञानासोबत माणसाच्या कामाचा वेगही वाढला आहे. मात्र या धकाधकीच्या आयुष्यात माणूस सुदृढ आरोग्यापासून वंचितच राहिलेला आढळतो. तणावपूर्ण जीवनशैेलीने त्याचे मानसिक संतुलन बिघडत आहे. तरी या मानसिक आजाराकडे समाजाचेही सर्वाधिक दुर्लक्ष होत आहे.

म्हणूनच या आजाराचे दुष्परिणाम कोणते आणि त्यातून बाहेर पडण्याचे उपाय काय आहेत याविषयी सखोल मार्गदर्शन या कार्यक्रमातून लाभणार आहे.

या चर्चासत्रात बदलती जीवनशैली आणि आजार या विषयावर शीव रुग्णालयाच्या प्राध्यापिका डॉ. संगीता पेडणेकर माहिती देणार आहेत. तर सुप्रसिद्ध व्यायाम प्रशिक्षक शैलेश परुळेकर व्यायाम आणि शारीरिक तंदुरुस्ती या विषयावर त्यांचे विचार मांडणार आहेत. बालरोगतज्ज्ञ आणि भावनिक बुद्धिमत्ता विशेषतज्ज्ञ डॉ. संदीप केळकर  हे मानसिक ताणतणाव आणि आरोग्य याविषयावर संवाद साधणार आहेत. तणावपूर्ण जीवनशैलीला दूर सारून मानसिक संतुलनातून शारीरिक आरोग्याकडे कसे जावे याची माहिती देणारे यंदाचे ‘लोकसत्ता आरोग्यभान’ हे वार्षिक २८ डिसेंबरपासून सर्वत्र उपलब्ध होणार आहे.

थायरोकेअर प्रस्तुत ‘लोकसत्ता आरोग्यभान’चे परांजपे अथश्री आणि पितांबरी हेल्थकेअर डिव्हिजन हे सहप्रायोजक आहेत आणि ब्रम्हविद्या साधक संघ हीलिंग पार्टनर आहेत.

कधी? : आज

गुरुवारी सायं ६.०० वा.

कुठे? : हॉटेल टिपटॉप प्लाझा,

ठाणे (प.)