ठाणे : कासारवडवली भागात शिवसेनेच्या (शिंदे गट) कार्यकर्त्यांच्या मारहाणीत जखमी झालेली शिवसेना उद्धव बाळासाहेब ठाकरे पक्षाच्या युवती सेनेच्या पदाधिकारी रोशनी शिंदे या गर्भवती नसल्याचे डॉक्टरांनी स्पष्ट केले आहे. तसेच त्यांना गंभीर इजा झालेली नसून, मुका मार लागलेला असल्याचेही त्यांनी स्पष्ट केले.
फेसबुक पोस्ट टाकण्यावरून ठाकरे गटातील महिला पदाधिकारी रोशनी शिंदे यांना शिंदे गटातील महिला कार्यकर्त्यांनी मारहाण केल्याचे समोर आले आहे. शोरूमच्या कार्यालयात जाऊन लाथा-बुक्क्यांनी मारहाण केल्याचा आरोप होत आहे. तसेच त्या गर्भवती असूनही त्यांना मारहाण करण्यात आल्याचे दावे ठाकरे गटाकडून करण्यात येत आहेत. परंतु वैद्यकीय चाचण्यांमध्ये त्या गर्भवती नसल्याचे उघड झाले आहे.
ठाण्यातील एका खासगी रुग्णालयात रोशनी यांच्यावर उपचार सुरू आहेत. रुग्णालयाचे डॉ. उमेश आलेगावकर यांनी मंगळवारी दुपारी पत्रकारांशी संवाद साधून त्यांच्यावर सुरू असलेल्या उपचारांची माहिती दिली. ही महिला गर्भवती असल्याची दोनदा चाचणी करण्यात आली असून, या दोन्ही चाचण्यांचा अहवाल नकारात्मक आलेला आहे. त्यामुळे ही महिला गर्भवती नसल्याचे स्पष्ट झाले, असे डॉ. आलेगावकर यांनी सांगितले. तसेच महिलेला गंभीर इजा झालेली नसून तिला मुका मार लागलेला असल्याचेही त्यांनी स्पष्ट केले. सध्या तिची प्रकृती स्थिर असून केवळ वैद्यकीय निगराणीसाठी तिला अतिदक्षता विभागात ठेवण्यात आले आहे, असेही त्यांनी सांगितले.
