कल्याण- कल्याण मध्ये कचरा वेचक कुटुंबातील एका १० वर्षाच्या मुलीचा सापर्डे गावातील एका ६१ वर्षाच्या ज्येष्ठ नागरिकाने सोमवारी रात्री विनयभंग केला. अल्पवयीन मुलगी रात्री नऊच्या सुमारास घराजवळील दुकानात जात असताना हा प्रकार घडला आहे, अशी माहिती खडकपाडा पोलिसांनी दिली.
हेही वाचा >>> डोंबिवलीत आयरे गावमध्ये तलाव बुजवून बेकायदा चाळींची उभारणी, भूमाफियांकडून १५० चाळींचे नियोजन
विनयभंग करणाऱ्या इसमाविरुध्द मुलीच्या आईच्या तक्रारीवरुन बाल लैंगिक अत्याचार कायद्याने (पॉक्सो) गुन्हा दाखल करण्यात आला आहे. पोलिसांनी सांगितले, कल्याण परिसरातील ग्रामीण भागात एक कचरा वेचक कुटुंब आपल्या मुलांसह राहते. दिवसभर पालिकेच्या कचराभूमीवर कचरा वेचण्याचे काम करुन त्यामधून मिळणाऱ्या उत्पन्नातून हे कुटुंब आपला उदरनिर्वाह करते. सोमवारी रात्री नऊ वाजण्याच्या सुमारास अल्पवयीन मुलीच्या वडिलांनी आपल्या मुलीला घर परिसरातील दुकानातून तंबाखुची पुडी आणण्यास सांगितली. मुलीने दुकानात जाऊन पुडी विकत घेतली. ती पुन्हा आपल्या घराकडे पायी येत होती. त्यावेळी तिला वाटेत एक ज्येष्ठ इसम भेटला. त्याने मुलीशी बोलण्याचा बहाणा करुन तिला काही कळण्याच्या आत जवळ खेचले. तिचा विनयभंग केला. मुलीने त्या इसमाला प्रतिकार करण्याचा प्रयत्न केला. त्याने दाद दिली नाही. मुलीने त्या इसमाला जोराचा झटका देऊन त्याच्या तावडीतून ती निसटली. घडल्या प्रकाराने मुलगी घाबरली होती. ती घरी रडत आली. तिने आपल्याशी वाटेत आपल्या भागात राहत असलेल्या एका इसमाने गैरवर्तन केले आहे, असे आई, वडिलांनी सांगितले.
हेही वाचा >>> “मर्द-मर्द म्हणणाऱ्यांनी मर्दासारखं वागावं”, ठाण्यात बॅनरद्वारे शिंदे गटाचा उद्धव ठाकरेंना टोला
पीडीत मुलगी, तिचे पालक आणि चाळीतील इतर रहिवासी मुलीने वर्णन केलेल्या प्रकाश सोंग्या पाटील (६१, रा. शिवनगर, सापार्डे, कल्याण) याच्या घरी गेले. तो घरी नव्हता. त्याच्या पत्नी, मुलाकडून पीडित मुलीच्या वडिलांनी त्याचा मोबाईल क्रमांक घेतला. त्याला संपर्क करुन तू माझ्या मुलीशी काय वर्तन केले, असा प्रश्न प्रकाशला केला. तेव्हा तो निरुत्तर झाला. त्याने नंतर संपर्काला प्रतिसाद दिला नाही. प्रकाशने आपल्या मुलीशी गैरवर्तन केल्याने पीडित मुलीच्या कुटुंबीयांनी प्रकाश पाटील विरुध्द विनयभंगाची तक्रार खडकपाडा पोलीस ठाण्यात सोमवारी दाखल केली. पोलिसांनी गुन्हा दाखल करुन प्रकाशचा तपास सुरू केला आहे. साहाय्यक पोलीस निरीक्षक एस. ए. गवळी याप्रकरणाचा तपास करत आहेत.
